Гъябгъюрайи йисан майдин 9-пи йигъан Табасаран райондиъ «Ургур чвуччвун ва сар чуччун гъалайиин» халкьдин яратмишарин «Рубасдин мукьмар» республикайин фес-тиваль кIули гъябгъиди.
Фестивалиъ Табасаран, Хив ва Дербент районарин ва Дагъустандин Огни шагьрин фольклорин коллективар, Табасаран ва Азербайжан драмтеат-рарин артистар, Кьасум Мягьямедовдин ччвурнахъ хъайи искусствйирин мектебдиъ урхурайидар, табасаран ва дагъустан эстрадайин машгьур артистар иштирак хьиди. Мидланра гъайри, фестивалиъ швнуб-саб выс-тавка тешкил апIиди, хъа Табасаран райондин гьарсаб гъулан администрацияйи чпин хусуси майднар гьатIарцциди. Улихьна йисариси, ццира фестивалин тешкилатчйир Табасаран райондин администрация ва Республикайин халкьдин яратмишарин хал ву.
«Табасаран райондиъ «Ургур чвуччвун ва сар чуччун гъалайиин халкьдин яратмишарин ва фольклорин «Рубасдин мукьмар» фестиваль кIули гъабхувал гъубшу аьсрин 80-пи йисарихъан мина аьдатнаъ абхънийи. Жюрбежюр себебариан думу гъабхувал саб вахтна дебкк-нийи. Кьяляхъна йисари учу фестиваль гъабхувал хъана аьдатнаъ ипнийча. Амма кьюд йис улихьна, ковиддин вирус тарабгънайивал себеб вуди, фестиваль гъабхуз ихтияр тувундайи. Хъа гъубшу йисан Табасаран райондиан СВО-йиъ иштирак шулайи 40-тIан артухъ эскрар кивунхьа. Гьарсаб гъулаъ салам ади райондин меркездиъ фестивалар гъухнийиш, халкь ихь гъавриъ хьидайи. Гьаддиз фестиваль тешкил апIувал жара вахтназ гъибтнийча. Ва гьаму йисан 9-пи майдиъ, Ватандин Аьхю Гъалибвалин йигъан, ихь вари ватандашариз фестивализ гъюз теклиф апIурача.
Гьаму жюрейин фестивалари ихь халкьдин аьдатар, чIал, тарих уьрхюз ва артмиш апIуз кюмек тувру. Мисалназ, фестивалиъ ихь халкьдин арайиъ тарагъну гъахьи «мил», «мархьлиз дих апIуб» «Беълийирин машквар» ва жара аьдатариан сягьнйир улупиди. Гьацира халкьдин ва эстрадайин мяълийир, халачи убхбаан, гъван ва рукь тартиб апIбаан, утIукбаан мастер-классар, милли хурагарихьди дабалгнайи майднар, столар ва хайлин жара мяракйир тешкил апIидича. ИкибаштIан, республикайин меркездиан ва жара шагьрариан хяларра хьиди», – гъапнийи Табасаран райондин культурайин управлениейин кIулиъ айи Аьбдулвагьаб Аьбдуловди.
