Урусатдин футболин союздин «Мектебдиъ футбол» проектдиъ иштирак шули, Табасаран райондин Шила гъулан кьялан мектебдин 3-пи классдиъ урхурайидарикан ибарат вуйи футболин команда (шиклиъ) республикайин дережайиъди кIули гъушу талитариъ полуфинализ удубчIвну.

 

Табасаран райондин администрацияйин физический культурайин, спортдин, жигьиларин ляхнарин ва туризмдин управлениейин кlулиъ айи Низами Агъаризаевди учуз туву мялуматариинди, жигьил табасаран футболистар финалин 1/8 ва 1/4 паяриъ Гъяйтагъ (3:0) ва Мягьярамкент (1:0) районариан вуйи командйириин гъалиб гъахьну. Полуфиналин талитар 7-пи майдиъ кIули гъягъиди. Команда талитарихьна Агъариза Аьлирзаевди гьязур апIура.

Табасаран райондиъ 1-пи майдиан 9-пи майдизкьан спортдин жюрбежюр жюрйириан талитар гъахиди.

1-пи майдиъ Бухьнагъ гъулаъ волейболиан Урусатдин Игит, генерал Рустам Мурадовдин ччвурнахъ хъайи республикайин турнир кIулиъ гъябгъиди. Му талитариъ республикайин муниципалитетариан 14 команда, гьадму гьисабнаан Дагъустандин Огни шагьриан, Хив ва Табасаран районариан командайир иштирак хьиди. Турнирин дахилнаъди Табасаран райондиан вуйи, зонйириз жара духьнайи командйирин арайиъра талитар кIули гъягъиди.

2-пи майдиан 9-пи майдизкьан райондин спортдин мектебариъ футболиан, волейболиан, юкьяр дисбаан, жаргъбаан, гирйир запIбаан, шахматариан ва шашкйириан талитар кIули гъягъиди.