Жямяаьлугъдинна политикайин машгьур кас Зикрулагь Ильясовди гъибикIу «Дюн’я дигиш гъапIу дагъустанлуйир» китаб чапдиан удубчIвуваликан ва ктабхъу йисан 9-пи декабриъ Мягьячгъалайиъ дидин презентация гъабхьиваликан ихь газатдин сайтдиъра макьала чап гъапIнийи.
Гьяйифки, думу китаб гьелелиг йиз хилиъ абхъундариз, хъа дидкан дибикIну айибдиинди, му китабдиъ 30 машгьур дагъустанлуйикан мялуматар тувна. Дурарин арайиъ чпин зегьметниинди ва бажаранвалиинди дюн’я дигиш апIуз гъабхьи машгьур аьлимар, Советарин Союздин ва Урусатдин Федерацияйин игитар, тарихи инсанар, писателар, художникар, артистар, композиторар, гьацдар жара сяняаьтарин устйир ва мяълийирин устадар, спортсменар ва жарадар а. Чапдиан удучIвнайи жюрбежюр макьалйирик гьамцдар ччвурар: вардиз таниш вуйи мялгьям (мазь) адабгъу аьлим-духтир Александр Вишневский, атомдин двигателарин конструктор Генрих Гьясанов, физик-атомдин энергияйин сяняаьткар Амир Амаев, аьршарин аьлакьайихъди тямин апIру техника адабгъдарикан вуйи Николай Оганов ва Мурад Капланов, космонавт Муса Манаров, машгьур тарихи инсанар вуйи имам Шамиль, шейх Мягьямед Ярагъи, шаир Расул Гьямзатов, Дагъустандин Госсоветдин гьюрматлу председатель Мягьямедяли Мягьямедов ва жарадар ктухура. БикIурайидарин гафариинди, китабдиъ, 1771-пи йислан ккебгъну, Гьябиб Нурмягьямедов бабкан гъахьи 1988-пи йис’ина гъяйизкьан вуйи тарихи вахт атIабгна.
Гьелбетда, му цIарар гъурху гьарсар табасаранлуйи, думу китабдик ихь миллетдин вакилар каш, гьерхди. Йиз дициб суалаз, ваъ – сар касра ктар, кIуру жаваб тувнийи.
Узу му китабдихьна илтIикIбан гьамциб саб далил айиз. Дагъустандин милли политикайин ва динарин ляхнариз лигру министерствойи ихь республикайиан вуйи ва харижи уьлкйириъ яшамиш шулайи, ясана улихьган яшамиш шули гъахьи машгьур инсанарикан (аьлимар, писателар, художникар, политикар, гьюкуматдин, жямяаьтлугъ ва диндин гъуллугъчйир, спортсменар) китаб адабгъуз планламиш дапIна. Гьамусяаьт дидин гьякьнаан гьюкуматдин жюрбежюр идарйириз ва жямяаьтлугъ тешкилатариз кагъзар дуфна: ухьуз ихь халкьдин вакиларикан мялуматар тувай, кIура. Ухьу фициб кьадарнаъди ва фициб ерийин материал тувиш, гьадму китабдиъ ихь миллетра гьациб дережайиъ атIабгну хьибди.
