Дагъустандин МВД-йин пресс-гъуллугънаан туву мялуматариинди, гъябгъюрайи йисан 1-пи апрелихъан 16-пи апрелиз республикайин рякъяриъ 50-тIан артухъ аварйир духьна. Думу хатIалу дюшюшариъ 10 кас гъийихну ва 80-тIан артухъ касдиз жюрбежюр гъагъишнан зийнар гъахьну. Дурарин арайиъ бицIирра а.
Аьхиримжи вахтна машин хъапIуз аьгъдарди вая хъапIуз ихтияр адарди, рякъяриъ шлу хатIа бегьемди фикриз гъададбгъди рулихъ деърайидарин арайиъ яшар бегьем духьну адру ясана машин хъапIуз ихтияр туврайи документ пулихъ масу гъадабгънайи жигьилар гизаф а.
Гьаци, апрелин эвелариъ Дербент райондин Билижи поселокдиан Къуллар гъулазди гъягъру рякъюъ машин хъапIуз дубгъурайи 17 йисаъ айи шуру, LADA Vesta машин дебккуз дархьиди, думу рякъюн гъирагъдихъди гъягъюрайи шубур дишагьлийиин алапIну. Гъахьи зийнариан кьюр дишагьли йишв’ин гъийихну, шубурпир, гъагъи зийнар духьну, реанимацияйиъ а. Шураз, яшар бегьем духьну адрувализ лигну, машин хъапIуз затра ихтияр адайи.
Му дюшюш дубхьну хъайигъан Мягьячгъала шагьриъ генерал Танкаевдин ччвурнахъ хъайи кючейиъ Hyundai Solaris машин хъапIрайи жигьил дишагьлийи гьялакди рякълан улдучIвурайи 9 йисаъ айи бицIи балиин машин алапIну. Бай больницайиъ а.
Апрелин 3-диан 9-пи йигъаз рес-публикайин рякъяриъ гъахьи 20 аварияйиъ 4 кас гъийихну, 32 касдиз зийнар гъахьну, дурарин гьисабнаъ хьур бицIирра а.
Гьюрматлу ватандашар, рякълан улдучIвуз светофорин ихтияр тувру акв кабхьнашра, дикъатлувал уьбхяй. ХатIа-балайихьан Аллагьди уьрхри. Мисалназ, апрелин 10-пи йигъан Мягьячгъала шагьриъ 42 йисаъ айи жвуву, фикрарикк ккахъну, дикъатвал дудубгнайи вахтна чан LADA XRAY машин светофорин чру акв кабхьну ади рякълан улдучIвурайи 17 йисаъ айи балиин алапIну. Республикайин МВД-йиан туврайи мялуматариинди, бай гьамусяаьт больницайиъ а.
Региондин госавтоинспекцияйин мялуматариинди, 10-пи апрелиан 16-пи апрелиз вуйи кьюбпи гьяфтайиъ Дагъустандиъ 30-рихьна аварйир гъахьивал гьисабназ гъадагъна. Дурарин натижайиъ кьюр кас гъийихну, 46-риз зийнар гъапIну, дурарикан шубур бицIир ву.
Рякъяриъ гюзчивал гъабхурайи инспекторарин гафариинди, аьхиримжи вахтна ДТП-йин гизаф дюшюшар рякъярилан улдучIвурайидарихъди аьлакьалудира арайиз гъюра. Гъубшу гьяфтайиъ рякълан улдучIвурайи кьюр бицIи баяр машинарикк ккахьну. Кьюбиб дюшюшариъра бицIидар рякълан улдучIвуз ихтияр айи йишвхьан ва светофорин чру акв кабхьнайи вахтна рякълан улдучIвурайи. Ичв дикъатлувал мудубганай. Гъийин рякъяриъ кьадарсуз гизаф машинар айи вахтна гьарсар касдин хатIасузвал анжагъ чакан асиллу шула.
