Расул Гьямзатовдин сурат капIнайи самолет вари дюн’я вуйибси тIирхиди. Мидкан 26-пи апрелиъ Ирандин «Pars Golden Sky» авиакомпанияйин кIулиъ айи Жавад Раджабийи РД-йин Правительствойин председатель Аьбдулмуслим Аьбдулмуслимовдихъди гъабхьи гюрюшдиъ ктибтну.
Дупну ккундуки, Ирандин делегация Дагъустандиз Расул Гьямзатовдин суратарихьди дабалгнайи самолетариъди гъафнийи.
Кьяляхъ хътакруган, Ирандин вакилари чпихьди Расул Гьямзатовдин кемшрикан гьязур дапIнайи бюстра гъабхуз кка. Думу Тегерандин университетдиъ майдин вазлиъ Расул Гьямзатовдин 100 йисандин юбилейиз бахш дапIнайи серенжемар гъахру вахтна ачмиш апIиди. Ядигарин проект скульптор Шамил Канагьяжиевди гьязур гъапIну.
Дупну ккундуки, Расул Гьямзатов саб-швнуб ражари Ирандиз хялижвди гъушур ву. Му уьлкейиин гьевеслу гъахьи шаири «Персияйин шиърар» кIуру шиърарин гъварчра гъибикIну.
Аьбдулмуслим Аьбдулмуслимовди хялариз му ляхин кIули адабгъуз вари терефариан кюмек тувуз гьязур вуйиваликан гъапну ва, Расул Гьямзатовдихьна ва дугъан яртамиш’ валихьна вуйи маракьлувализ лигну, хялариз чухсагъул мялум гъапIну.
