Апрелин вазлиъ къайд апIру машкврин йигъарин арайиъ ухьу яшамиш шулайи Жилин йигъра а. Думу йигъ 22-пи апрелиъ дюн’яйин 190-тIан артухъ уьлкйириъ къайд апIуру. Жилин йигъ къайд апIувалин метлеб – инсанарин фикир табиаьтдин марццивал уьбхбахьна жалб апIувал ву.

 

 

Сабпи ражари Жилин йигъ 1970-пи йисан США-йиъ къайд гъапIну, хъа 1990-пи йисан думу вари халкьарин машквриз илтIибкIну. Думуган дюн’яйин 141 уьлкейин 200 миллион кас, инсанарин фикир Жилин марццишин уьбхбан месэлйирихьна жалб апIури, гъудужвнийи. Жилин йигъ къайд апIуз хъюгъювали гележегдиъ ихь наслариз марцци жил гъибтуз кюмек тувру цIийи къанунар, экологияйин тешкилатар арайиз гъахну.

Хъа фукьан къанунар адагъишра, тешкилатар тешкил гъапIишра, жилин марццишин уьбхбак гьарсар касди чан пай ктривиш, ужуб натижайихъ хъуркьидар. Гъийин девриъ хъархъас кьадарсуз артухъ дубхьна. Шагьрариъси, гъулариъра гизаф хъархъас уч дубхьнайи йишвар арайиз дуфна. Ригъ алабхъру терефнан гизаф уьлкйириъ, Азияйиъ, Америкайиъ хъархъас тартиб апIру заводари ляхин апIура. Думу уьлкйириъ инсанари хъархъас жа-жаради уч апIура. Урусатдиъра гизаф шагьрар гьадму аьдатнахъна дуфна. Хъа ихь республикайин агьалйири гьеле хъархъас жа-жаради уч апIуз дудубгънадар.

Жилиз хъайивал апIуб сад йигъан ваъ, гьар йигъандин ляхнарин саб пай вуйивалин гъавриъ духьну ккунду. Жилин марццивал уьбхбак ичвра пай кивай!