Апрелин аьхиримжи йигъари ихь уьлкейиъ «Скорая помощь» станцияйиъ лихурайи фельдшерарин ва духтрарин пишекарвалин йигъ кьайд гъапIну.
Дербент шагьрин ЦГБ-йиъ лихурайи тяди кюмек тувру фельдшерар машкврихъди тебрик апIуз ният ади, аьзарлуйириз сабпи нубатнаъ кюмек тувру «Скорая помощь» отделениейиз илтIикIунза. Гъи думу отделениейиъ хайлин ихь ватанагьлийирра лихура, гьадрарин цIарнаъ жилирна хпир Мехтиеварра. Мурарихъди гюрюшмиш хьайиз, дурарин ляхнин яршугъарихъди, Мехтиеварин гьякьнаан гафар-чIалар гъапIнийза. Ляхнин ярашугъари туву мялуматариинди, Шериф ва Элиза Мехтиевар (шиклиъ) жумарт юкIв айидар, аьзарлуйинра, сагъуринра гъайгъушнаъ айидар, ужуб гаф апIрудар, суткайин фуну вахтна вушра, дих гъапIу йишваз гъягърудар ву.
Аьхирки аьзарлуйихьна душнайи фельдшер Шериф Мехтиев кабинетдиз гъафнийи, ва узу дугъахъди сюгьбат гъубхнийза.
Шериф Нухтарович Мехтиев Краснодариъ айи Кущевский медучилище ккудубкIну, Дербент шагьриъ «Скорая помощь» станцияйиъ фельдшерди 2018-пи йисхъан мина лихура. Ва сифте гаф-чIал Шериф Мехтиев лихурайи тяди кюмек тувру станцияйин ляхникан гъапIнийча.
«Духтирвал лап рягьимлу, амма читин пишйирикан саб ву. Гьеле думу пише ктабгъругантIан, гьаци вуйибдин хабар вуйзуз. Гъи йиз кьисматниин гизаф рази вуза. Тяди кюмек тувру станцияйиъ ужуб тажруба гъазанмиш апIуз мумкинвал тувру, фицики увуз му-шваъ жюрбежюр аьзарлуйирихъди лихуб алабхъуру. Коллектив лап албагуб вуйич. Мушваъ тахминан 130-кьан пишекрари ляхин апIура, гьадму гьисабнаан 29 духтри, 100-кьан фельдшери ва санитаркайи. Гьаму пишекрари Дербент райондин, Дербент ва Огни шагьрарин агьалйирин медицинайин игьтияжар гьуркIра. Ич идарайин кIулин духтир Девлетхан Мирзахановди ужудар пишекрарикан ибарат вуйи коллектив уч дапIна. Гьаци дарш, ляхин апIуз читинди алабхъуру, фицики аьзарлуйин сагъламвал духтри сабпи нубатнаъ туву кюмекналан гизаф асиллу ву.
– Йигъан, кьялан гьисабариинди, швнуб ражари аьзарлуйирихьна дих апIури шулчвуз?
– Дюзди кIуруш, 15-20 ражну аьзарлуйирихьна дих апIру йигъарра шулу, цIибдира. ВаритIан читинди ковид уьзур айи вахтна алабхъунчуз. Суткйириинди лихури гъахьунча.
– Дербент район аьхюб ву, дих гъапIиган гьарсаб гъулаз тядиди хъуркьуз мумкинвал ачвуз?
– Ав ачуз, аьхюбсиб пай дих апIувалар гъулариз шулу. Дербент райондиъ ярхлади ерлешмиш духьнайи гъуларизра гъягъру вахтар шулич, меселназ Билижи терефназ, Джемикент терефназ. Саспи вахтари рякъяриъ гизаф машинар хьувалиан аьзарлуйихьна хъуркьуз цIиб кьанра шулич. Хъа ихь уьлкейиъ тяди кюмек тувру машинариз рякъ тутруврудариз гьадабтIру жаза ижми гъапIхъантина, ляхин цIиб рягьят гъабхьнийич.
– Ичв ляхниъ аьхиримжи вахтариъ шад апIру фицдар дигиш’валар гъахьну?
– ЦIийи машинар тувунчуз, дармнарин тяминвалра ужуб вуйич. Сабпи медицинайин кюмек тувру отделение цIийи оборудованиейихъди тямин дапIна. Духтрин хиликк лазим вуйиб вари ккайиган, аьзарлуйиз сабпи кюмек тувузра рягьятди шулу.
– Шериф Нухтарович, сюгьбатнан аьхириъ кьюб гаф яв хизандиканра йип. Узуз аьгъюб, яв хпир Элизайира увухъди сабси ляхин апIура…
– Ав, йиз уьмрин дуст Элиза ва узу сатIиди лихурача. Элиза Дагъ. Огни шагьриъ ерлемиш дубхьнайи тяди кюмек тувру пунктнаъ фельдшерди лихура. Ич ляхнин дежурствйириз нубатнахъди гъягъюри шулча, фицики хулаъ кьюр кьюдюхрар-бицIидар айич, ва дурар ялгъузди гъитуз шулдар. Йиз дада Гюллерира аьхю кюмек туврачуз.
Иццру дапIнайириз, зиян дубхьнайириз вая аьзар кубчIвнайириз сабпи нубатнаъ туву кюмекнакан думу сагъ хьпан натижа гизаф асиллу ву. Ихь ватанагьлийириз вахтниинди кюмекнан хил гьачIабккбан бадали кIулди тяди кюмек тувру станцияйин коллективдиз ва жаради Мехтиеварин хизандиз ляхниъ заан хъуркьувалар ва мюгькам сагъвал ишри.
