9-пи майдиъ, Гъалибвалин Йигъаз бахш вуди, Табасаран райондин Кьалухъ Мирзайин ччвурнахъ хъайи спортдин дараматдиъ футбол, волейбол, теннис, шашкйир ва шахматар уйнамиш апIбаан, юкьяр дисбаан райондин «майдин» вазлин спортдин аьдати талитар кIули гъушну. Табасаран райондин администрацияйи тешкил дапIнайи спортдин машквар 1-пи майдиан 9-пи майдизкьан давам гъабхьну.
Шашкйириан вуйи талитарин финалиъ гьарганси Хючна гъул’ан вуйи Исмяил Исмяилов ва НичIрас гъул’ан вуйи Зиявудин Хаирбегов гюрюшмиш гъахьнийи. Спортдин женгнаъ Исмяил Исмяилов гъалиб гъахьнийи. Шубубпи йишв ТIюрягъ гъулан агьали Тимур Кьасумовди гъадабгънийи.
Шахматар уйнамиш апIбаъ Акъа гъул’ан вуйи Мягьямед Рамазановди 7 балл гъадагъну, сар касдизра чаин гъалиб хьуз мумкинвал тувундар. ЧвулатI гъул’ан вуйи Замир Гюловди ва НичIрас гъул’ан вуйи Мягьямед Мукаиловди хьу-хьуб очко гъазанмиш гъапIнийи.
Юкьяр дисбаан вуйи талитариъ варитIан гизаф медалар гъадагъуз мумкинвал гъабхьнийи. Талитар 16 жюрейин гъагъ айи спортсменарин арайиъ кIулиъ гъухнийи. Хусуси хъуркьуваларилан савайи, командйирин хъуркьуваларра къайд гъапIнийи.
Гьарганси, гьамусра талитариз тамаши апIуз дуфнайидарин варитIан юкIв али спортдин жюре футбол вуйи. Ягъдигъ гъулан футбол уйнамиш апIру командайи Гюгьрягъ-Гурихъ командайихъди вуйи талитнаъ сабпи йишв гъадабгънийи, Хючнаарин гъулан команда шубубпи йишваз удубчIвнийи.
Уч духьнайидар Къужник ва Бухьнагъ гъуларин командйирин арайиъ волейболиан кIули гъябгъру талитназра гизаф ккилигурайи. Думу талитар 2:1 гьисаб ади Бухьнагъ гъулан волейболин команда гъалиб хьувалиинди ккудукIнийи. Шубубпи йишв Гум’арин гъулан советдин командайи гъадабгънийи.
«Майдин» спортдин серенжемариъ Табасаран райондин глава Мягьямед Къурбанов, РД-йин Халкьдин Собраниейин депутат Алавудин Мирзабалаев, райондин администрацияйин гъуллугъчйир, спортдиин машгъул вуйи жямяаьтлугъдин вакилар, аьдати агьалйир иштирак гъахьнийи.
«Аьхиримжи йисари райондин гизаф гъулариъ спортдин майднар ачмиш гъапIну. Спортдиин машгъул вуйидариз, жара йишвариз дурушди, жвуван гъулаъ жюрбежюр талитариъ иштирак хьуз мумкинвал дубхьна. Натижйирра ачухъди рякъюра: гизаф гъулариъ футболиан, волейболиан командйир тешкил дапIна. Дурари пишекарвалиинди туп уйнамиш апIруган, тамши апIуз кIваз хуш шулу», – къайд гъапIну Мягьямед Къурбановди, гъалибчйириз пешкешар тувруган.
Спортдин вари жюрйириан гъалибвалин йишвар гъадагъдариз дипломар, медалар, багьалу пешкешар тувнийи.
