Апрелин аьхириъ Каспийск шагьрин «15-пи нумрайин мектеб – Каспийскдин образованиейин центр» урхбан идарайин бинайиин алди, «ВаритIан ужур классный руководитель» кIуру мялимвалин устадвал улупру конкурс кIули гъубшну. Душваъ ихь республикайин муниципалитетарин мектебариан хайлин классный руководителар иштирак гъахьну.
Конкурс кIули гъабхбан метлеб – райондин мектебариъ лихурайи мялимарин арайиъ заан удукьувалар айи классный руководителар ашкар апIувал вуйи. Думу жюрейин конкурс гьарсар мялимдиз чан пишекарвалин устадвал за апIуз тувнайи мумкинвалсира гьисаб шулу.
Республикайин конкурсдин финалин талитнан натижайиъ сабпи йишв Хючнаарин 2-пи нумрайин мектебдин мялим Мильянат Мягьямедовайи гъазанмиш гъапIну.
Гьелбетда му чан, Мильянат Мягьямедовайинси, Табасаран райондин образованиейин гъурулушдинра, мялим лихурайи мектебдин коллективдинра хъуркьувал ву. Узу, му гъалибвалихъди тебрик дапIну, Хючнаарин 2-пи нумрайин мектебдин директор Панах Султановдикан Мильянат Мягьямедовайин гьякьнаан артухъси мялуматар тувуб ккун гъапIнийза.
«Мялимвал – гьюрматлу пишйирикан саб ву. Ухьуз тербия ва аьгъювалар туву мялимар, фукьан яш гъабхьишра, кIваълан гъягъюрдар. Хючнаарин кьюбпи нумрайин кьялан мектебдиъ табиаьтдин дарсар киврайи Мягьямедова Мильянат Гюлагъаевнара гьацдарикан сарси гьисаб апIуз шулу.
Мильянат Мягьямедовайи чан мялимвалин рякъ 1992-пи йисан ккебгъну. Гьаму мектебдиъ мялимди лихури, дугъан сумчIур йистIан артухъ ву. Думу гьарсар урхурайирин хасият аьгъю дапIну, гьаммишан варидарин кIвахьна рякъ абгуз чалишмиш шлур ву. Чав лихурайи коллективдин арайиъра дугъаз аьхю гьюрмат а. Мильянат Мягьямедовайихь аьгъювалар гъадагъу урхурайидари райондин ва республикайин конкурсариъ, олимпиадйириъ гъалибвалин йишвар гъазанмиш апIуру.
Жигьил насил бадали зигурайи дугъан загьмет мектебдин дирекцияйин, райондин образованиейин управлениейин кIулиъ айидарин, райондин администрацияйин терефнаан гьюрматнан грамотйир, чухсагъул мялум апIбан кагъзар тувбиинди лишанлу дапIна. Ва Мильянат Мягьямедова, чав гъазанмш гъапIу гъалибвалихъди тебрик апIури, ич Хючнаарин 2-пи нумрайин мектебдин ва мялимарин коллективди дугъаз гележегдиъра жандин сагъ’вал, жигьил наслиз мюгькам аьгъювалар ва тербия тувбан рякъюъ аьхю хъуркьувалар ккун апIура», – гъпнийи Панах Султановди.
