Дявйирин цIигъян хътакуб кьисмат дархьидариз ва хъадакну гъафидариз ядиграр дивруган, дурарин дадйир кIваин шулузуз. Асланарсдар кьюр бай Ватан уьбхюз дявдиз гьаъну, дурариз ккилигбан зиллет аьх гъапIу, сарну бай дявдиан дарфи, хъа тмунур вари уьмриъ гьяса хьади лицру саягъ гъафи Мина баб Митаровайиз икрам дарапIди гъузуз шулин! Гьелбетда, дугъан баяриз бахш вуйи серенжемдиъ ихь машгьур устадари гъапIу мяълийир, «ялгъуз ужагъ дипну», бай гъушу ва «гьарган фикрикк ккайи» дадайикан вуйи. Ухьу Дербент райондин Чинар гъулаъ Багьаутдин ва МутIалиб Митароварин ччвурнахъ хъайи кючейиъ 5-пи майдиъ ядигар-тахта кебхбаз бахш вуди кIули гъубшу серенжемдикан улхурахьа. Ватандин Аьхю дявдин иштиракчйир ва табасаран совет литературайин биначйир вуйи ччвйир Митаровариз му гьюрматнан тахта кебхбан месэла дивур ва му ляхин тешкил гъапIур Табасаранарин милли культурайин автономияйин рягьимлувалин отделин кIулиъ айи, Табасаран райондин Жямяаьтлугъ палатайин председателин заместитель Айваз Гьюсейнович Рамазанов ву.
Серенжемдиз Митароварин аьхю хизандиан ва багахьлуйирикан Б. Митаровдин худлар ва гудлар дуфнайи. Машгьур шаирарин гъардшин бай, физикайинна математикайин илмарин доктор, Дагъустандин гьюкуматдин технический университетдин профессор Ризван Гьяжимирзаевич Митаровди чан удучIвну улхбаъ эмарикан гьамци гъапну: «Дурари окопариъ бикIури гъахьну. Дурарин эсерар гъубшу тарихи уьмур атIабгнайи аьнтIикьа документар ву. Дурар дигиш апIуз хай шулдар».
Гьацира серенжемдиъ Чинар гъулан глава Азад Герейханов, му гъулан агъсакъларин кIулиъ айи Аьбдуразакь Аьбдурашидов, Дербентдин депутатарин корпусдин председателин заместитель, Табасаранарин милли культурайин региондин автономияйин председатель Айваз Аьлиханов, Хючна гъулан администрацияйин кIулиъ айи Аьбдуселим Гираев, жямяаьтлугъ касар Гьялим Гьялимов, Гьясратяли Гьясратялиев, Табасаран райондин ЦБС-дин директор Рафик Аьлиев, Дербент райондин табасаранарин милли автономияйин председатель Аьгьмед ТIайибов, Тахо-Годийин ччвурнахъ хъайи ДНИИП-дин гъуллугъчи Ширинат Жамалиева, шаирар Шюшеханум Керимова ва Сувайнат Кюребегова, «Ппази» журналин редактор Феруза Султанова ва жарадар иштирак гъахьнийи.
Чинар гъулан мектебдиъ бабан чIалнаан дарсар киврайи мялим Мадина Жабраиловайи ва Сюгют гъулан мектебдин завуч Имамат Аьшурбеговайи гьязур дапIнайи баяр-шубари серенжемдиъ ччвйир Митароварин шиърар гъурхнийи. Табасаран театрин актёрар – Дагъустандин лайикьлу артист Аьбдуллагь Мирзакеримовди, Мягьямедзакир Рамазановди ва Фаина Аьбдуллаевайи серенжемдин мянайиз гъилигу мяълийир гъапIнийи. Мярака Табасаран театрин актер Аким Сяидялиевди ва узу, гьаму макьалайин автори, кIули гъубхнийча.
«Аьхю чухсагъул му ляхниз разивал туву Чинарин глава Азад Герейхановдиз, дакьатнан кюмек тувдариз вардиз – дурарин арайиъ «Табасаранар» фонднан директор Гюлмягьямад Расуловдиз, ляхнин гьарсаб терефнаъ яракар гъахьи Физули Маллаевдиз ва жямяаьтлугъ кас Ариф Гьяжикеримовдиз, Табасаран театрин директор Аьлимурад Аьлимурадовдиз ва му ляхниз гъюн ккиву ихь миди вуйи ватанагьлийириз вардиз», – гъапну ватанпервервалин аьхю кьадар гьамцдар серенжемарин ва гьаму баркаллу мяракайин тешкилатчи Айваз Рамазановди, арайиз гъафи ляхнин натижйир йивури.
