«Читин вядайи игитар яратмиш апIуру. Уьмри вахт-вахтарик ихь рюгь ижмиб вуш, ухьу Ватандиз вафалу вуш, ухьуз ихь халкь якьинди ккундуш, ахтармиш апIуру. Гъи ихь баяри Украинайиъ думу экзамен заан кьиматназ тувра», – гъапну Ккувлигъ гъулан агъсакъал ва мялим Мегьемер Гьяжиибрагьимовди хусуси метлеб айи дявдин операция гъябгъюрайи йишваъ игитвалиинди жан диву Шамсудин Назимович Муталимовдиз ядигар-тахта кебхбаз бахш дапIнайи серенжемдиъ. Му серенжем 6-пи майдиъ Табасаран райондин Ккувлигъарин кьялан мектебдин икриъ кIули гъубшну. Дидиз улихьна йигъан Шамсудиндин адашна дада Назим ва Гюзел Муталимоварихьна райондин кIулиъ айи Мягьямед Къурбановди балин Кьягьялвалин орден тувну.

 

 

Ядигар абццбан серенжемдиз гъулан жямяаьт, ихь игитрин аба, адаш, дада, майил-мадат, мялимар ва мектебдиъ урхурайи баяр-шубар уч духьнайи. Гьацира мина Табасаран райондин главайин заместитель Рамис Уьсманов, Аь.Тахо-Годийин ччвурнахъ хъайи ДНИИП-дин илмин гъуллугъчи Ширинат Жамалиева, шаир, «Литературайин Табасаран» журналин редактор Шюшеханум Керимова ва жара хялар дуфнайи.

Мектебдин терефнаан гизаф мяналу программа гьязур дапIнайи. Директор Рягьим Сеидмягьямадовди, дугъан заместителари ва мярака кIули гъубху мялимари, гъулан имамди ва хялари гъапи гьарсаб гаф ва гьарсар бицIири гъурху шиир марцци гьиссари, 2020-пи йисан му мектеб ккудубкIну, хизансиб коллективдиан ва гъулан жямяаьтдигъян гъушу Шамсудиндин хажалатну ацIнайи.
Шамсудин Муталимовдиз бахш дапIнайи ядигар-тахта 17 йис улихьна Ватандин гъуллугънаъ гьюкуматдин ляхнихь уьмриан гъушу, гьаму мектеб ккудубкIу Гьяжиибрагьимов Назир Мегьемеровичдин ядигарин багахь кебхнайи. Назир Гьяжиибрагьимовдин адаш Мегьемер Аьлиевичди мушв’ин гъурху К. Симоновдин шиърин цIарариъ ядигар-шиклариан лигурайи игитарин уьмур атIабгнайи:

 

Гъагъи азадвал а ухьуз:
Багъри дада итну яснаъ,
Жвуван халкь апIуб аьжалсуз
Жвуван аьжалин кьиматнахъ.