Игитриз ядигар дивну

 

 

Ватан уьбхювал, эскервалин буржи тамам апIувал гьарсаб девриъ аьхю гьюрмат айи халис жиларин кесп вуди гьисаб шула. Ватан уьбхбан вазифа кIулиз адабгъури, агъзрариинди эскрари чпин ччвурар аьсрариз адлу гъапIну. Гьадрарин арайиъ Урусатдин Федерацияйин Игит, Кафари флотилияйин 200-пи жаради вуйи мотострелковый бригадайин танкариз аькси идара апIру ракетйирин батареяйин командир, капитан Исрафил Летифович Мягьямедовра а.

 

 

8-пи майдиъ Гъалибвалин Йигъаз бахш вуйи серенже-марин дахилнаъди ихь республикайин саки вари районариъ ва шагьрариъ Украинайиъ гъябгъюрайи хусуси метлеб айи дявдин операцияйиъ гъийиху эскрариз кIваин уьрхбан тахтйир ачмиш апIбан мяракйир кIули гъушну. Му терефнаан Дагъ.Огни шагьриъ кIули гъуху серенжемар варитIан аьхю мяна айидарси гьисаб апIуз шулу, фицики шагьрин 4-пи нумрайин мектебдин икриъ Урусатдин Федерацияйин Игит Исрафил Мягьямедовдин ядигар ва душваъ урхури гъахьи юкьурсан эскриз – Аслан Агъарягьимовдиз, Руслан Шагьсиновдиз, Тельман Султановдиз ва Ариф Мягья-медовдиз – кIваин уьрхбан тахтйир ачмиш гъапIну.

Игитар кIваин уьрхбан серенжемдиз дуфнайи гьюрматлу хяларин арайиъ Исрафил Мягьямедовдин дада Магьизат, аьхюну гъардаш Аьбдулмалик, чи Гюльзаман ва Исрафилин уьмрин юлдаш Зарина, дугъан бай Летиф ва риш Малика, имбу игитарин хизанар ва багахьлуйир, хъа гьацира Табасаран ва Хив районарин кIулиъ айи Мягьямед Къурбанов ва Ярмет Ярметов, генерал Рустам Мурадовдин адаш Уьсман Мурадов ва чве Ризван Мурадов, РД-йин Халкьдин Собраниейин депутатар Сефер Аьлиев, Имран Аваев, чан хушниинди СВО-йиз гъушу депутат Расим Гьяжиагъаев ва хайлин жарадар айи.
Серенжем ачмиш апIури, Дагъ. Огни шагьрин кIулиъ айи Жалалудин Аьлирзаевди Украинайиъ гъябгъюрайи хусуси метлеб айи дявдин операция ккебхъанмина душваъ хайлин дагъустанлу эскрар иштирак шулайиваликан ва дурари, Ватан уьбхюри, чпин жанар фида апIурайиваликан гъапнийи.

«Ватан бадали жанар фида гъапIу игитарин гьюрмат ва дурарин ядиграр ухьу гьаммишанлугъ дюрхну ккунду. Ватандин Аьхю дявдин вахтариси, гъийин девриъра ихь жигьил наслар багъри уьлке уьбхюз кIваантIан гьязур ву-йивалин ухьу вари шагьидар гъахьунхьа, фицики аьдати халкьдин терефнаан жвуван хушниинди Украинайиъ кIули гъягъюрайи гъизгъин женгариъ иштирак хьуз гъягъюз ккунидарин кьадар лап аьхюб гъабхьнийи. Дурарин арайиъ жюрбежюр гъуллугъариъ лихурайидар, дявдин гъуллугъчйирси, аьдати кеспарин эйсйир, жюрбежюр яшнан касар айи. Ихь жигьиларин асас пай халис ватанперверар вуйихь. Гьамцдар игитар дюрхну, арайиз адагъбаз гъи ухьу дурарин абйир-бабарин, дурариз дарс киву ва тербия туву мялимарин улихь кIулар ис апIурхьа», – гъапнийи Жалалудин Аьлирзаевди ва Исрафил Мягьямедовдин дада Магьизат Шагьбановайиз кюкйирин кунцI тувнийи.

Му йигъан митингдиъ удучIвну гъулхдарин гафарин асас мяна саб вуйи: Украинайин аьтрафариин кIули гъягъюрайи гъизгъин женгариъ чпин жанар диву игитар кIваълан гьархну ккундар.
Серенжемдин аьхириъ Дагъ. Огни шагьрин глава Жалалудин Аьлирзаевди, Исрафил Мягьямедовдин ччвурнахъ хъайи 4-пи мектебдин директор Расим Мирзоевди, Исрафилин чве Аьбдулмаликди ва дугъан бай Летифди Урусатдин Федерацияйин Игит Исрафил Мягьямедовдиз бахш вуйи ядигар ачмиш гъапIнийи. Мектебдиъ урхури гъахьи ва Кьягьялвалин орденарин сагьибар вуйи юкьби эскраризра дурарин багахьлуйирин иштирак’валиинди кIваин уьрхбан тахтйир арццнийи.

Хъасин Летиф Мягьямедовди чан адашдиз бахш дапIнайи шиирра гъурхнийи. «Узу гьарган адашдиинди дамагъ апIидиза, думу, Ватан уьбхюри, уьмриан гъушну», – Летифди кIурайи шиърин гафарихъ хъпехъурайи хайлин касарин улариина нивгъарра гъафнийи.
Серенжемдин кьяляхъ узу дидиъ иштирак гъахьи бязи касарикан серенжемдин гьякьнаан чпин фикрар ачмиш апIуб ккун гъапIнийза.

Заира Мягьямедова, Исрафил Мягьямедовдин хпир:

«Фу пузахъа, гъи вари гафарра ккудукIнайиз, вахтра дугъубжвнайиз… Йиз жилир Исрафили гъи ихь уьлкейин вари халкьариз Ватандихьна вуйи чан ккунивал улупну. Йиз хизандин терефнаан Дагъ. Огни шагьрин кIулиъ айи Жалалудин Аьлирзаевдиз аьхю чухсагъул пуз ккундузуз. Исрафил вахтсузди уьмриан гъушу йигъланмина дугъу чан терефнаан ич хизандиз гизаф фикир тувра. Му мектебдин мялимарин зегьметназ ва сабурлувализра аьхю чухсагъул пуз ккундузуз. Дурари Ватандин хьур лайикьлу игит баяриз ватанпервервалин тербия тувну, дурар халис игитарси гьязур гъапIну. Гъи магьа му мектебдин гьяятдиъ гъябгъюрайи серенжемра заан дережайиъди гьязур дапIнайидар мектебдин мялимар ву.
Исрафилин гьаммишан чан мектебдин дустарихъди ва мялимарихъди аьлакьа ади шуйи. Дугъу кми-кмиди кIуйи: «Гьаз-вуш аьгъдарзуз, Зарина, амма узу гъурху мектеб йиз багъри халси, хъа душваъ лихурайи мялимар багъри касарси ккундузуз»… Магьа гъи чан гьамци юкIв хъайи багъри мектебдиъ дугъаз ядигар дивну, ва думу гьаммишанлугъдиз мина гъафну».

Аьбдулмалик Мягьяме-дов, Исрафил Мягьямедовдин аьхюну чве:

«Мициб заанвалин серенжем тешкил гъапIдариз аьхю чухсагъул кIураза. Йиз чве улихьди ва имбу ихь игит эскрари гъапIу игитвалар гъюзимбу наслариз лап аьхю дарс хьибди, хъа дурар ихь юкIвариъ гьаргандиз гъузди. Хъа гьеле Исрафил чIивиди имиди дугъаз Урусатдин Игит ччвур тувбан ихтилатар гъя-гъюрайи, амма йиз чве дицисдар, учв улупру ляхнар ккунир дайи. «Узу Ватандин улихь йиз буржи тамам апIурайи офицер вуза», – кIуйи дугъу. Гьаци вушра, дугъахъди гъуллугъ апIурайи офицерари, эскрари, Урусатдин Федерацияйин Игит Исрафилин кьюбпи ччвур ву, кIури, текрар апIури гъахьну».

Расим Гьяжиагъаев, Халкьдин Собраниейин депутат:

«Урусатдин Яракьлу кьувватариъ гъуллугъ апIурайи эскер гьаммишан ихь тарихнаъ гъузди. Гьаз гъапиш дугъан вазифа гьациб ву: намуслуди гъуллугъ апIуб, лазим гъабхьиш, жвуван жанра дивуб. Гъи ихь игит баяри Ватан бадали чпин жанар дивурайивалин ухьу вари шагьидар вухьа. Гьаму гьяятдиъ дивнайи Исрафил Мягьямедовдин ядигари дидкан шикиллуди кIурана ву».