20-пи майиан хъюгъну, Табасаран, Хив, Дербент районарин, Дербент ва ва Дагъ.Огни шагьрарин мектебариъ урхувал ккудубкIурайи баяр-шубариз аьхиримжи зенг йивбан серенжемар кIули гъушну.

 

 

Табасаран райондин Хючна гъулан сабпи нумрайин лицейиъ, ТIаттларин ва Хянгъярин кьялан мектебариъ шадлугънан линейкйир 20-пи майиъ кIули гъухну ва 11-пи ва 9-пи классариъ урхурайидариз аьхиримжи зенг гъивну.

Вари уьлкейин мектебариъси, гьаму гьяфтайиъ райондин мектебариъра имтигьнар ккергъди.

Аьдат вуйиганси, аьхиримжи зенг йивруган, гьарсаб мектебдиз райондин администрацияйин, образованиейин управлениейин, жямяаьтлугъ тешкилатарин ва абйир-бабарин терефнаан вакилар гъюру. Хючнаарин сабпи нумрайин лицейин баяр-шубар му йигъахъди тебрик апIуз Табасаран райондин глава Мягьямед Къурбанов гъафнийи.
Шадлугънан серенжемдиз урхурайидар, мялимар, мектеб ккудубкIурайи баяр-шубарин абйир-бабар уч гъахьнийи.
«Гъи учвуз йивурайи мектебдин аьхиримжи зенг – аьхю уьмрин рякъюз сабпи зенгра ву. Ичв улихь имтигьнар тувувал, кIваз хуш вуйи пише тувру урхбан идарйирик кучIвувал, цIийи мумкинвалар ва цIийи гюрюшар ва хъана хайлин месэлйир дийигъна.

Учву гъурху мектебдиъ мялимари вари терефарихъан аьгъювалар тувну, думу аьгъювалари учвуз кIван мурадарихъ хъуркьуз кюмек тувур кIури, умуд кивурхьа. Уьлкейин ужударсдар вузарик урхуз кучIвну, ужуб пишейин эйсйир духьну, бицIи Ватандиз кьяляхъ гъидичва, райондин яшайишдин дережа за апIбак лайикьлу пай кивай», – гъапнийи чан удучIвну улхбаъ Мягьямед Къурбановди.

Лицейин директор Жейран Къулиевайи мектеб ккудубкIурайи баяр-шубариз имтигьнар ужуди тувувал, уьмрин дюз рякъ ктабгъувал ккун гъапIнийи. Дугъу гьаму йисан лицейин 16 выпускникди 11-пи класс, хъа 46 касди 9-пи класс ккудубкIурайиваликан гъапнийи. Дурар вари гьюкуматдин натижалу имтигьяндихьна деетна. Выпускникарин арайиъ гъизилин медаль гъадабгъуз лайикь вуйи 4 кандидат а.

Аьхиримжи зенг йивбан линейкайиъ баяр-шубар сабпи ражари мектебдиз кьабул гъапIу сарпи мялимар, гизаф йисари бицIидарикан ужубра-харжибра дябкънашра, чпин веледарси бицIидар ккун духьнайи классдин кIулиъ айидар удучIвну улхруган, хъа гьамус дурар аьхю уьмриз гьаърайиган, баяр-шубари мялимариз бахш дапIнайи шиърар урхруган, уч духьнайидарин кIваз пашман гьиссар гъюйи.

Мектебдин линейка аьхиримжи зенг йивбиинди ккудубкIнийи.
Къайд дапIну ккундуки, 2023-пи йисан Табасаран райондиъ 345 урхурайидари 11-пи класс ва 823 – 9-пи класс ккудукIну
22-пи майиъ Хив райондин вари мектебариъ 11-пи классариъ урхурайи 133 выпускникдиз ва 9-пи класс ккудубкIу 239 ученикдиз аьхиримжи зенг гъивну.

Мектебарин аьхиримжи зенг йивбан асас серенжемар райондин Хив гъулан М. Шамхаловдин ччвурнахъ хъайи кьялан уьмуми мектебдиъ кIули гъухнийи. Выпускникариз мектебдин директор Физули Аьбдулазизовди, классдин руководителари, сабпи классариъ урхурайидарин ва абйир-бабарин терефнаан улупнайи вакилари хайлин мани гафар гъапнийи ва гележегдин уьмриз ужудар насигьятар тувнийи. Серенжемдиъ Хив райондин кIулиъ айи Ярмет Ярметов, РД-йин Халкьдин Собраниейин депутат Расим Гьяжиагъаев, Хив райондин имамарин советдин председатель Шябан Салигьов, образованиейин отделин начальник Назаряли Тарланов, Хив гъулан глава Фахрудин Рамазанов ва хайлин жарадар иштирак гъахьнийи.

«Выпускникар мектеб ккудубкIбахъди тебрик апIураза. Хъуркьувалиинди, ужудар натижйириинди имтигьнар тувну, учву кадабгънайи вуздиз раккнар ачмиш ишричвуз. Ихь урхурайидарихъ вафалу зегьмет зигурайи мялимаризра, урхбан гъавриъ ади янашмиш шулайи абйир-бабаризра чухъсагъул кIураза. Сабпи класс ккудубкIу ученикаризра сагъ’вал ва аьгъювалар гъадагъбаъ хъуркьувалар ишри», – гъапну Ярмет Ярметовди.

«Выпускникариз лап важиблу серенжемдиъ иштирак шулайивалиин узу кIваантIан шад вуза. Имтигьнариан заан натижйир гъадагъну, кIваъ айи вуздик урхуз кучIвуз ягъур ибшричвуз. Гьамусяаьт ихь уьлкейин ЦIийи республикйир уьрхюрайи баярикан улхури, пуз ккундузузки, вари гьавайиди гъюдубчIвну ккундар. Учвура думу баяриз ухшардар, багъри Ватандин лайикьлу ватанперверар духьну ккунду», – тебрикнан гафар хьади выпускникарихьна СВО-йин иштиракчи, РД-йин Халкьдин Собраниейин депутат Расим Гьяжиагъаевра илтIикIнийи.
Серенжемдин имбуну хяларира, выпускникар му йи-гъахъди тебрик апIури, дурариз ужудар насигьятнан.

Хъасин аьгъювалар гъадагъбаан, спортдин цирклиан ужудар натижйир улупу баяр-шубар, мектебдин уьмриъ жанлу гьевескрар гьюрматнан грамотйир тувбиинди лишанлу гъапIнийи. Серенжем, аьдат вуйиганси, аьхиримжи зенг йивбиинди ккудубкIну. Выпускникарин улихь ЕГЭ тувбан, хъа дидин кьяляхъ пише ктабгъбан рякъ ди-йибгъна.
23-пи майиъ Дагъ.Огни шагьрин мектебариъ урхурайи 790 баяр-шубариз аьхиримжи зенг гъивнийи. Шагьрин 7-пи нумрайин кьялан мектебдиз аьхиримжи зенг йивбан серенжемдиз мектебдик мялимар, урхурайидар, шагьрин администрацияйин вакилар, выпускникарин абйир-бабар гъафнийи. Шадвалин линейкайиъ мектебдин директор Хадижат Аскендеровайи выпускникар му важиблу йигъа-хъди тебрик гъапIнийи. «Учву наан гъахьишра, ихь аьхю насларси, намуслу ватанперверар йихьай. Учвуз дилигну, ихь халкьдиз, учву аьхю гъапIу абйир-бабариз ва мялимариз заан кьимат тувиди», – гъапнийи дугъу.

Выпускникариз аьхю уьмриз ягъурлу рякъ ккун апIури, дурариз дарсар киву мялимар, классдин руководителар, абйир-бабарин комитетдин терефнаан вакилар удучIвну гъулхнийи. Хъасин мектебдиъ урхурайидари шиърар гъурхнийи, сягьнйир улупнийи, мяълийир ва ялхъвнар гъапIнийи. ЙицIисад йисан ужуди гъурхдариз, олимпиадйириъ гъалибвалин заан йишвар гъадагъдариз ва мектебдин жюрбежюр сернжемариъ иштирак гъахьидариз грамотйир тувну.
Мектебдин директор Хадижат Аскендеровайин гафариинди, 787 бай-риш урхурайи 7-пи нумрайин кьялан мектебдиъ 11-пи класс ккудубкIурайи 12 выпускниктIан адар, фицики урчIвубпи классдихъан аьхюну пай урхурайидари мектеб гъибтра, 11-пи классдиз вузарик урхуз кучIвуз ккунидартIан гъузрадар. «Узу гъи гьаму 12 урхурайидарин хъуркьувалариин гизаф рази вуза. Дурарикан кьюри – Сяид Гьяжимягьямедовди ва Мюгьяммад Мирзаевди – гъизилин медализ мектеб ккудубкIну. Ич выпускникари вузариъ имтигьнар рягьятди тувбак умуд кивраза.

 

Гьюрматлу выпускникар. Учвуз варидариз ягъур ибшри. Хъуркьувалариинди имтигьнар тувну, ният дапIнайи вузарик урхуз кучIвуз кьисмат ибшричвуз.