Гъубшу гьяфтайиъ, 27-пи майиъ, вари Урусатдиъ Библиотекйирин йигъ къайд гъапIнийи.
Думу йигъахъди аьлакьалу серенжемар улдучIвбан кьяляхъ, узу Хив райондин кьялан библиотекайин гъурулушдин директор Зумрия Сеидягьмедовайихъди сюгьбат гъубхнийза. Дугъан гафариинди, райондиъ сабпи биб-лиотека (китабар урхрударин хал) Хив гъулаъ гъубшу аьс-рин 1935-пи йисан абццнийи. Дидиз Бес Пашаевайи регьбервал туври гъахьну. Гьяйифки, сабпи библиотекайикан вуйи архивдин бикIбар гъийин йигъаз гъузундар. Думу вахтари библиотекайин фондназ китабар комсомолин тешкилатдин вакилари уч апIури гъахьнийи. Гъийин йигъан райондин ЦБС-дин дахилнаъ 23 филиал а.
«Саб вахтна Хив райондиъ кьяланубра кади 28 библиотека гьяракатнаъ айи. Дурар райондин гъулариъ ерлешмиш духьна. Улихьна йисари райондин Арчугъ, Ккувигъ, УртIил ва Цлак гъулариъ, инсанар жара йишвариз кючмиш духьну, лап цIибтIан хизанар имдрувализ лигну, библиотекйир хъяркьну. Хайлин гъулариъ библиотекйир клубарихъди сатIиди цIийи алаъну. Мисалназ, ЦIийи Фрюгъ, ГъуштIил, Гъвандикк, Кашкент, Яракк, ЦIудухъ гъулариъ библиотекйир бина-йиан рас ва вари лазим вуйи алатарихъди тямин гъапIну, гьадму гьисабнаан компьютерарихъди ва цIийи китабарихъди. Магьа гьаму йигъарира ич фондназ китабар гъадагъуз 170 агъзур манат жара дапIна. Дюзди гъапиш, му пулихъ вари библиотекйириз гьуркIну китабар масу гъадагъуз шулдар. Гьаци вушра, учу саки вари библиотекйирин фонд йисан цIийи китабариинди яркьу апIуз чалишмиш шулача. Деври улупурайиганси, китабар урхбахьна инсанарин аьшкь дигиш гъабхьну. Вушра, райондин глава Ярмет Ярметовди ва культурайин цирклиз регьбервал туврайи Казбек Къазиевди библиотекайин артмиш’вал затра зяиф хьуз гъитрадар», – гъапну Зумрия Сеидягьмедовайи.
Гъийин йигъан Хив райондин библиотекайин китабарин уьмуми фонднаъ 127802 китаб а. Му китабар ктарди, библиотекайиз гьар гьяфтайиъ ва вазлиъ газатар ва журналар гъюра. Гьяйифки, библио-текайин бюджетдиъ улихьна йисариси хайлин газатариз ва журналариз подписка апIуз дакьатар гьуркIрадар, хъа вушра табасаран чIалниинди вуйи газатар ва журналар дурари гьар йисан подписка апIувалин аьдат ккубтIрадар.
«Библиотека – му жямяаьтлугъ идара ву. Гьаддиз библиотекйирин фондариз вахтну ихтибарлу хьуз гъитнайи классикайин, юрд аьгъю апIбан, Урусатдин жюрбежюр циркларин энциклопедйирин китабар масу гъадагъурача. Гъи жигьилари асас вуди психологияйин, экономикайин ва юриспруденцияйин китабар урхуз гъадагъура. Гьяйифки, жигьилари улихьна йисариси классикарин эсерар урхури имдар. Хъа библиотекайиз гъюрайидарин уьмуми кьадар 10 агъзуртIан артухъ ву. Ич асас урхрудар 6-14 йисариъ айи бицIидар ва живанар ва 50 йистIан артухъ яшар духьнайидар ву», – къайд апIура директори.
Ав, гъи библиотека деврин тIалабариз жаваб туври артмиш шула. Хив райондин ЦБС-диъра чпин ляхин цIийи къайдайиинди ккабалгну гъабхура. Вазлин арайиъ дурари швнуб-саб акция, выставка, флешмоб, писателарин юбилеяриз, жюрбежюр машкврариз бахш дапIнайи серенжемар гъахури шулу. Гьаму йисандин эвеларианмина гъийин йигъаз дурари, педагогдин йисаз ва Расул Гьямзатов бабкан духьну 100 йис хьпаз тялукь вуди, саки 10-15 мажлис тешкил дапIна.
«ИкибаштIан, гьарсаб зегьметнан коллективдин девлет – чпин ляхин ккуни ва пишейиз вафалу инсанар ву. Ич коллектив лап албагуб ва сар-сарихъан юкIв убгруб ву. Вари серенжемар учу сатIиди гьязур апIурача. Хив райондин библиотекайин гъурулушдиъ хайлин йисари гъилиху, ужуб тажруба айи вакиларси, хайлин бажаранлу жигьиларра лихура. Библиотекайин гъурулушдин аьхюнуб пай вакилар 15 йистIан артухъ зегьметнан стаж айидар ву. Му цирклин ветеран вуйи Ургъа гъулан библиотекайин заведующий Зейнудин Рамазанов улупуз ккундузуз. Му кас библиотекайиъ лихури 40 йистIан артухъ ву. Думу аьхю гьюрмат айи, чан ляхнихьна намуслуди янашмиш шлу, шиърар дикIбиинра машгъул духьнайи гъуллугъчи ву. Ккугъ гъулан библиотекайин заведующий Ханум Аьгьмедова ва ЦIинитI гъулан библиотекайин заведующий Мяисат Идрисова хайлин йисари лихурайидар ву. Дурари, гьаммишан библиотекайиз чпин гъуларин бицIидар ва жигьилар уч апIури, дурарихъди серенжемар кIули гъахури шулу. Гьацира райондин асас библиотекайиъ лихурайи урхрударин залин заведующий Раида Аьликберова, комплектованиейин отделин заведующий Маина Нурмягьямедова, бицIидарин библиотекайин вакилар Ханхалум Рамазанова ва Зубарьят Рамазанова жаради къайд апIуз ва дурариз чухсагъул пуз ккундузуз. Му инсанари, вафалуди зегьмет зигури, чпин вари уьмур ккуни ляхниз ва инсанар китабар урхбиина жалб апIбаз бахш апIура», – аьлава гъапIнийи Зумрия Сеидягьмедовайи.
