Гьамусяаьт республикайин журналистар Урусатди Украинайин аьтрафариин кIули гъабхурайи хусуси метлеб айи дявдин операцияйиъ иштирак шулайи эскрарихъди саки гьар йигъан гюрюшмиш шула. Нубатнан ражари СМИ-йин вакилар 14-пи июндиъ дарги чIалниинди чапдиан удубчIвурайи республикайин «Замана» газатдин редакцияйиъ СВО-йин сарсана иштиракчи, Акъуша райондин Балхар гъулан агьали Жамалудин Амирхановдихъди гюрюшмиш гъахьну.
Гюрюшдиъ дугъу чан уьмрикан ва хусуси метлеб айи дявдин операцияйиз чав филан ва фици гъушур вуш ктибтну.
Къайд апIуб лазим вуки, Жамалудинди туву мялуматариинди, дугъан абара, Ватандин Аьхю дявдин вахтари, учв яшнан бицIир вуйивалиан дявдиз гъададагърайивализ лигну, къалп документар гьязур дапIну ва дурарик чан яш цIиб артухъди улупну, жвуван хушниинди дявдиз гъушу кас ву. Хъа гъи дугъан худул бай Жамалудинра, жвуван хушниинди 6 вазлиз контракт йибтIну, Ватан бадали чан буржи тамам апIуз гъушну.
«Узу 2009-2010-пи йисари армияйиъ гъуллугъ гъапIур вуза. Кьяляхъ гъафири йиз адашдихъди тикилишчивалин ляхнар апIуз хъюгъюнза. Контрактдиин къул дизигну, хъанара армияйиз гъягъюр кIури, гьич фикриъкьан адайиз, амма, рябкъюрайи аьгьвалат гъагъиб вуйивализ лигну, Ватандиз кюмек апIуз кьаст дапIну, дина гъушур вуза. 180 йигъандин арайиъ Запорожский областдин аьт-рафариин женгариъ иштирак духьну, контрактдин вахт аьхирихъна гъюбан кьяляхъ, хъадакну гъулаз гъафунза. Контракт ккудубкIайиз цIиб вахт ккимиди уч’ина гьюжум гъапIу вахтна, хилиз зиянра гъабхьнийиз, аммаки больницайиз илтIикIундарза. Хайлин вахтнан арайиъ йиз хил узу сагъ гъапIунза.
Жамалудин Амир-хановдин яш 36 йис ву. Дугъаз кьюр веледра а. 2020-пи йисан дугъан уьмрин юлдаш кешмиш гъахьну, ва гьаддихъанмина бицIидариз лигурайир думу учв ву.
«Йиз хизандин гьял читинуб вушра, узхьан ватанпервервал улулупди гъузуз гъабхьундарзухьан. Фицики, закурин йигъан йиз веледари узхьан гьерхуз мумкин ву: «Дяви гъябгъюрайи вахтна уву наан айва, адаш?». Гьаму суалназ кIул за дапIну жаваб тувуз ва гьацира узу дина гьягъювал йиз веледариз нумуна хьуз кIури, гъушур вуза.
Дюзди кIуруш, узу дина гъягъюз ккайиваликан гьич саризра мялум дайи. Анжагъ военкоматдиъ айидаризтIан. Йиз дадайихьан учв инвалид вуйивалиан йиз веледариз лигуз даршлуган, дурарихъди гъузбан бадали, узу йиз адашдиз дих гъапIунза, аммаки узу наана ва гьаз гъягъюрайир вуш, дугъазра якьинди гъапундайза. Шубуб вазлилан, видео кабхьну, узу чахъди телефондиан гафар апIурайи вахтна, адашдиз пакьарин сесер гъеерхьну ва узу наана гъушур вуш, думу гьадмуган гъавриъ ахъну», – кIура Жамалудинди.
Журналистарихъди сюгьбатнаъ Жамалудин Амир-хановди гьацира чахъди гъуллугъ апIури гъахьи баярикан, чаз алахьу читинваларикан ктибтнийи. Дугъан гафариинди, варитIан асас читинвал, увухъди хъайи юлдшик гюлле кубкIну, гьадгъаз фукIа гъабхьиш, дугъан абйир-бабариз дидкан мялум апIувал ву.
– Учу саб йишв уьбхюрайи 27 кас вуйча. Гьаммишан сар-сариз кюмек апIури, чвйирси сатIиди гъахьунча. Гьамусра, узу хулаъ ашра, саки гьар йигъан дурарихъди аьлакьайиъ аза. ИкибаштIан, сабансан контракт йибтIну, дина гъягъюз шулзухьан, амма йиз веледар тербияламиш апIувал чарасуз лазим ву. Гьаддиз сарун кьяляхъ гъягъюз планариъ адариз.
Душваъ шулайи гьядисйир лап гъагъидар ву. Увухъди хъайи баяриз фукIа гъабхьиш, багъри касдиз дубхьнайиси дерд шулу. Узуз айидар кьюр гъардаш вуйзуз, гьамус 27 гъардаш азуз.
180 йигъандин арайиъ гьадушваъ имиди варитIан йиз кIваълан дурубшру йигъ, йиз дуст бай Махсуд Шихялиевдик гюлле кубкIну, думу кечмиш гъахьи йигъ вуйиз. Дугъан майит душмнарин терефнаан ихь терефназди кьюр-шубур касди йишвандин вахтна лап гужниинди гъабхунча. Гьадмугандиз жилар ишури зат гъябкъюб дайзуз. Жигьилур, яш айир дарпиди, вари бицIи баярси майтихъ ишуйи. Думу йигъ йиз зат кIваълан дурубшур, – гъапну Жамалудин Амирхановди.
