Гьамусяаьт вари Урусатдин мектебариъ, выпускникари жюрбежюр предметариан саб вуйи имтигьнар туври, гъизгъин вахт ву. Гьаму гъизгъин йигъари мектебдин выпускникарин, дурарин абйир-бабарин ва мялимарин гьялакди лихурайи юкIвар анжагъ мектеб ккудубкIурайидари ужуди ЕГЭ тувбииндитIан сикин апIуз шулдар. Хъа сасдар выпускникари думу юкIвар шадвалиан хъана гужалди лихуз гъитра. Гьацдар дирбаш выпускник шубарикан сар – Каспийск шагьрин «А.И. Гьяжибеговдин ччвурнахъ хъайи 3-пи нумрайин СОШ» МБОУ-йиъ урхурайи, гьамусяаьт саб вуйи имтигьнар тувбан гъайгъушнаъ айи ихь ватанагьли Милана Аьдиловара ву. Учв Милана Каспийск шагьриъ бабкан гъахьну, хъа дугъан ата-бабйир Хив райондин Заан Яракк гъул’ан ву.
26-пи майиъ мектебдин выпускникари химияйиан, урус литературайиан ва географияйиан туву ЕГЭ-йин натижйир 8-пи июндиъ мялум гъапIнийи. Думу натижйириз асас вуди, Миланайи химияйиан туву ЕГЭ-йиан 100 балл гъадагъну.
Каспийск шагьрин 3-пи нумрайин мектебдин директор Мадинат Агъаевайин гафариинди, Милана, ккергъру классарианмина хъюгъну, урхуз ва ляхин апIуз аьшкь айи, аькьюллу, начар апIру, гьарган чан метлеб тамам апIбахъ хъергнайи, жарарин ляхнин гъайгъу зигру бицIир вуйи.
«Ич мектебдиъ урхурайири ЕГЭ-йиан 100 балл гъадагъур кIури, учу мижкьан киврадайча. Миланайин классдин руководитель Мафизат Мягьямедовайи, узуз телефондиан зенг дапIну, чан классдиъ 100 балл гъадагънайир айиз гъапиган, узу дишлади Миланайикан улхурайибдин гъавриъ гъахьунза. Му, Миланайизси, кIулди вари ич мектебдиз шадвалин гьядиса ву, фицики ич мектебдианн мукьан гизаф кьадар баллар гъадагъу урхурайир сабпи ражари арайиз удучIвну», – дамагъ кади гъапнийи Мадинат Мягьямедовнайи.
Мялум вуйиганси, аьгъювалар – ихтибарлу гележегдин бина, шибритI шула. Хъа Миланайин му бина мюгькамуб вуйивал варитIан заан тяриф апIуз лайикь ву. Миланайиз табии илмарин жерге багахь ву: дугъу чаз варитIан ккуни предметарси химия, биология ва математика гьисаб апIура.
«Къайд дапIну ккундуки, Милана Аьдиловайи анжагъ саб химияйиан ваъ, хъа имбуну предметарианра ужуди урхура. Гьаддиз дугъу мектебдиъ урхурайи вари вахтна, жюрбежюр предметариан вуйи олимпиадйириъ иштирак’вал апIури, гъалибвалин ва пешкешнан йишвар гъадагъури гъахьну. Дидкан дугъаз айи аьхю кьадар грамотйири, дипломари, иштиракчийин шагьадатнамйири ва гьацдар жара пешкешари шагьидвал апIура. Анжагъ 2023-пи йисан Миланайи, вари Урусатдин мектебариъ урхурайидарин арайиъ кIули гъубшу «Гъит уж’валнан гафну рюгь уягъ апIри…» вари Урусатдин яратмиш апIбан конкурсдиъ, биологияйиан кIули гъубшу региондин олимпиадайиъ, «Бабан чIалниинди варитIан ужуди дагъустандин авторарин эсерар урхрур» республикайин конкурсдиъ иштирак духьну, пешкешнан йишвар гъазанмиш дапIна.
Урхбаъси, Милана классдиъ жюрбежюр жямяаьтлугъ серенжемар гьязур апIбаъра мялимарин кюмекчи ву. Гьаддиз думу аьхиримжи йисари классдин дигиш дарапIру староста вуди гъахьну», – гъапнийи Миланайин классдин руководитель Мафизат Залмуевайи.
«Узуз бицIидимиди гьярфар улупур, урхуз улупур йиз рягьматлу Тамал баб вуйиз. Дугъу узуз гьаммишан: « Вари иццурайидар сагъ апIуз, йиз шуркан ужур духтир апIурза», – кIури шуйи. Гьадмуган бабан гафари гьевеслу гъапIури, гьамусра думу фикир дигиш гъапIундарза. Йиз мурад-метлеб – И.М. Сеченовдин ччвурнахъ хъайи сабпи Москвайин гьюкуматдин медицинайин университетдик урхуз кучIвну, савадлу духтир хьувал вуйиз», – кIура Милана Аьдиловайи.
Дупну ккундуки, Милана имтигьнарихьна чан кIул’индии, жара касдин кюмек адарди гьязур шула. Дугъу 13-пи июндиъ биологияйиан вуйи ЕГЭ-ра тувну. Думу имтигьяндианра заан баллар гъадагъну, Миланайиз чан мурадарихъ хъуркьувал, гележегдин уьмриъ ягъурлу рякъ ккун апIурхьа.
