Гьаму улихьнаси, Урусатдин йигъан гъаншариъ, Дагъустандин Глава Сергей Меликовди, хайлин йисари лайи-кьлуди зегьмет зигури, чпин ляхниъ тафавутлу гъахьи ватандашариз гьюкуматдин наградйир тувбан серенжемар кIули гъубхну.
Дицдар касарин ара-йиъди Хив райондин ЦРБ-йин фельдшер Равият Муслимовайизра «РД-йин сагъламвал уьбхбан лайикьлу гъуллугъчи» кIуру ччвур тувну.
Хив райондин ЦРБ-йин кIулин духтир Индира Багъичевайи ич сюгьбатнаъ къайд гъапIганси, Равият Муслимова Хив райондин ЦРБ-йиъ медицинайин тяди хъубкьру кюмекнан дестейин дахилнаъ фельдшерди лихури 30 йистIан артухъ ву.
«Равият Муслимова ужуб тажруба айи, фициб дюшюшнахьнара гьязур пишекар ву. Думу медицинайин кюмек ккун апIурайи касдихьна духтир хътарди, анжагъ фельдшерарин дестейихъди гьаишра, дугъаз медицинайин вари къанунариинди ва къайдйириинди кюмек тувуз аьгъя. Узура, думура Хив ЦРБ-йиъ 1990-пи йисарин эвеларианмина лихурача. Му йисарин арайиъ саркьана касдикан дугъан гьякьнаан чIуруди улхури вая наразивал улупури гъеебхьундарзуз. Аьксина, иццурайи касари дугъан адресназ сикин дарди тярифнан гафар кIуру. Равият Муслимова ужуб хасиятнан, жарарин дерд чанубси гьисс апIру, сагъламвал мюгькам апIурайи касарихьна гьюрматниинди ва жавабдарвалиинди янашмиш шлу, инсандихъ хъпехъуз аьгъю ва язухъ апIру, рягьимлувалин юкIв айи инсан ву», – гъапну Индира Багъичевайи.
Равият Муслимова 1974-пи йисан Хив райондин Ккугъ гъулаъ бабкан гъахьну. 1991-пи йисан думу Красноярск шагьриъ медицинайин училищейик урхуз кучIвру. 1994-пи йисхъан мина гъийин йигъазкьан Равият Муслимова Хив райондин ЦРБ-йиъ медицинайин тяди хъубкьру кюмекнан дестейин дахилнаъ фельдшерди лихура. 2016-пи йисан думу варитIан заан категория ва «Сагъламвал уьбхбан отличник» ччвур тувбиинди лишанлу гъапIнийи. Мидланра гъайри, фидакар зегьмет зигбаз лигну, Равият Муслимова РД-йин сагъламвал уьбхбан министерствойин терефнаан хайлин гьюрматанан грамотйир ва баркаллагь мялум апIбан кагъзар тувбиинди тафавутлу духьна. Равият Муслимовайин шурура дадайин пише ктабгъну. Дугъу медицинайин академияйиъ урхура.
Дугъриданра, дугъу кюмек гъапIу хайлин аьзарлуйири тасдикь апIурайиганси, кюмек тувуз гъафиган, Равият Муслимова духтрин кьяляхъ ваъ, хъа дугъан гъвалахъ шулу. Миди дугъан пишекарвалин заан дережайикан ва хайлин йисарин тажрубайикан кIура.
Гъит медицинайин идарйирин вари гъуллугъчйир инсандин сагъ’валин гъайгъушнаъ айидар, аьзарлуйирин сес ебхьрудар ва дугъахъ хъпехъуз аьгъюдар ишри.
Равият Муслимова заан ччвур тувбахъди тебрик апIури, дугъаз гележегдиъ хъана заан хъуркьувалар ккун апIурхьа.
