Урусатдин Федерацияйин Президент Владимир Путиндин указдиинди, 2023-пи йисан хьадукран призыв 15-пи июлизкьан давам хьибди. Учу улихьнара мялум гъапIганси, шагьрарин ва районарин призывдин комиссйири, призывникариз повесткйир хъадаъну, духтрари дурарин сагъламвал ахтармиш апIура ва армияйиз гъуллугъ апIуз гъягъюрайидарин сиягьар гьязур апIури, дурар десте-дестеди РФ-дин Яракьлу кьувватариз гъуллугъ апIуз гьаъра. Улихьдиси, гьамусра армияйиъ 12 вазли гъуллугъ апIуру.
Президентдин указдиъ дупнайиси, хьадукран призывдин вахтна вари уьлкейиан 147 агъзур жигьил армияйиз гьаувал планламиш дапIна. Думу гъубшу йисандин хьадукран призывдин кьадартIан артухъ ву, думуган 134,5 агъзур жигьил армияйиз гъушнийи.
Хьадукран призывдин вахтна Дагъустандиан яракьлу кьувватарин жергйириъ гъуллугъ апIуз 4 агъзуриинакьан жигьилар гъягъиди.
13-пи июндиъ Табасаран райондианра армияйиз гъягъюрайи баярин 6-пи десте гьапIну. ГвачIнин ухди Табасаран райондин военный комиссариатдин гьяятдиъ муниципалитетдин глава, призывдин комиссияйин председатель Мягьямед Къурбанов, дугъан заместителар, жямяаьтлугъдин вакилар, призывникарин абйир-бабар уч гъахьнийи.
Яракьлу кьувватарин жерг-йириъ гъуллугъ апIуз гъягъюрайи баярихьинди илтIикIну, Мягьямед Къурбановди насигьятнан гафар гъапнийи. «Урусатдин Яракьлу кьувватарин жергйириъ гъуллугъ апIувал – гьюрматнан ляхин ву. Ватандашди Ватандин улихь чан буржи тамам дапIну ккунду, хъа гьаддин кьяляхъ, чаз кьабул гъабхьиш, контракт йибтIну, дявдин гъуллугъ давам апIуз шулу», – гъапнийи райондин кIулиъ айири. Табасаранари яракьлу кьувватарин жергйириъ гьарган халис кьягьялариси намуслувалиинди чпин гъуллугъ гъабхури гъахьну, гьаддиз тазади армияйиз гъягъюрайи жигьиларира чпин буржи намуслувалиинди тамам апIрувалик чан умуд кайивал къайд гъапIнийи Мягьямед Къурбановди.
Табасаран райондин военный комиссар Садыкь Мурадялиевди хабар тувганси, армияйиз гъахурайи жигьилар СВО-йин зонайиз гьаърадар.
Жигьилар рякъюъ тIауз дуфнайи райондин жямяаьтлугъ палатайин председатель Аьлимирза Гьясановди, Агьли касарин советдин председатель Къумалат Къумалатовди, армияйиз гъягъюрайи жигьиларин абйир-бабари призывникарикан Ватандиз намуслуди гъуллугъ апIувал, эскервалин низам-къайда чIур дарапIувал ккун гъапIнийи.
Урусатдин Йигъ къайд апIбан шадлугънан серенжемарин дахилнаъди Хив райондианра хьур жигьил Ватандин улихь чпин буржи тамам апIуз армияйин гъуллугъназ гьаъну.
– Гьюрматлу дустар! Урусатдин Федерацияйин Яракьлу кьувватарин жергйириъ гъуллугъ апIували инсандин жвуван мурад-метлебарихъ хъуркьувалин, кIван дурумлувалин ва аьх апIувалин лишнар мюгькам апIуру. Мидланра гъайри, армияйин йисари жигьиларикан гъудуркьу жилар, гележегдиъ чпин хусуси хизанарин эйсйир, абйир шлувалин рякъюъ важиблу роль уйнамиш апIура. Фицики ичв хасият, ичв эдеблувал, ичв кIван ижми кьастарин рюгь иллагьки армияйиъ кIалибназ гъибди, – гъапнийи, призывникарихьна илтIикIну, Хив райондин кIулиъ айи Ярмет Ярметовди.
Армияйиз гъягъюрайи жигьилариз Хив ва Агъул районарин военный комиссар Сулейман Гьюсейновди ва думу жигьилар дуланмиш шулайи шубуб муниципальный образованйирин вакиларира насигьятнан гафар гъапнийи.
***
«Табасарандин нурар» газатдин редакцияйин коллективдира армияйин жергйириз Ватандиз гъуллугъ апIуз гъягъюрайи баяриз ягъурлу рякъ, ислягь завар, чпин буржи тамам дапIну, сагъ-саламатди кьяляхъ гъювал ккун апIура!
