Майин 30-пи йигъан Мягьячгъалайиъ Дагъустан Республикайин Халкьдин Собраниейин сумчIурна йирхьубпи сессия кIули гъубшну.
Гьял апIбан бадали, сессияйиз 29 месэла адагънайи. Сессияйин ляхин жа-жара фракцйирин вакилар гъийин йигъаз тялукь вуйи жюрбежюр месэлйирин гьякьнаан удучIвну улхбалан ккебгънийи.
Хъасин депутатар «2018-пи йисан садпи январилан 2018-пи йисан садпи декабризкьан РД-йин аьтрафариин али культурайин, сагъламвал уьбхбан, образованиейин, яшайишдин игьтияжар гьуркIбан тешкилатари гъапIу ляхнин ерийин натижйириз асиллу дару кьимат тувбан гьякьнаан» Дагъустандин Правительствойин сарпи вице-премьер Анатолий Карибовди удучIвну гъурху РД-йин Глава В.А.Васильевдин гьякь-гьисабнан докладдихъ хъпехънийи. Дугъу къайд гъапIганси, 2018-пи йисан яшайишдин цирклин 1219 тешкилат, яшайишдин гъуллугъар гьуркIбан 52 идара, медицинайин 112 идара, культурайин муниципалин 229 ва республикайин 12 тешкилат, муниципалин образование-йин 770 ва республикайин 54 тешкилат ахтармиш гъапIну. Кьимат: образованиейин цирклиз – 66,4, яшайишдин гъуллугъар гьуркIру идарйириз – 95, сагъламвалин идарйириз – 87, культурайин идарйириз – 79 балл дивну. Докладдин кьяляхъ депутатари ляхнин ери за апIбан чпин теклифарикан гъапнийи.
Парламентдин Председатель Хизри Шихсяидовди къайд гъапIганси, му жюрейин доклад Халкьдин Собраниейиз сабпи ражари адабгъна. Республикайиъ гъахьи цIийивалариз фикир тувувал лазим ву.
Сессияйиъ гьацира мировой судйир тяйин апIбан месэлара гьял гъапIну. Къанунчивалин, гьюкумат тикмиш апIбан ва ерли самоуправлениейин Комитетдин председателин заместитель Артур Шагьнавазовди къайд гъапIганси, мировой судйирин кандидатурйир аьлава вуди Комитетдин заседаниейиъ тасдикь дапIнайидар ву.
Депутатари гьял гъапIу месэлйирин арайиъ «Дагъустан Республикайиъ коррупцияйиз аьксивал улупбан гьякьнаан» РД-йин Къанундин 5-пи маддайиъ дигиш’валар тIаъбан гьякьнаан», «РФ-дин аьтрафариин гьясил апIурайи бензиндин, дизелин убгрубдин, моториз вуйи ччимдин акцизарилан Дагъустан Республикайин муниципалин образованйирин ерли бюджетариз пулин дакьатар тувбан гьисабар гъахбан жюре тасдикь апIбан гьякьнаан», «Абйир-бабар хътарди гъузу йитимарин яшайишдин гъайгъушнаъ хьувалин» ва гьацдар жара месэлйир айи.
