17-пи июндиъ Ургур чвуччвунна сар чуччун гъалайин аьтрафариин спортдин аьхю серенжем – ММА жюрейин кчIихбариан Eagle FC тешкилатдин вари халкьарин арайиъ вуйи 52-пи турнир кIули гъубшну. Дидиъ Казахстандиан, Киргизияйиан, Узбекистандиан Азербайжандиан, Беларусь Республикайиан ва Дагъустандиан машгьур спортсменар иштирак гъахьнийи.
Хьуд агъзуртIан артухъ тамашичйир уч духьнайи турнириз гьюрматлу хяларди вари дюн’яйиз машгьур духьнайи Хабиб Нурмягьямедов ва Ислам Мягьячев, Eagle FC тешкилатдин президент Шамил Завуров, ва гьацира республикайин спортдинна физический культурайин министр Сажид Сажидов, Дербент ва Дагъустандин Огни шагьраринна Табасаран ва Хив районарин главйир ва республикайин Халкьдин Собраниейин депутатар дуфнайи. Талитариъ табасаран спортменарра – Багьаудин Абасов, Шамил Аьлибегов ва жарадар иштирак гъахьнийи.
Турнирин асас кчIихбар Урусатдиан вуйи Анвар Чергесовдинна Казахстандиан вуйи Руслан Туяковдин (74 кг гъагъи айи спортсменарин категорияйиъ) ва Урусатдиан вуйи Багьаудин Абасовдинна Белорусияйин спортсмен Максим Пугачевдин (70 кг. арайиъ кIули гъушнийи. Ихь кьюрид ватанагьлийирра чпин кчIихбариъ гъалиб гъахьнийи. Къайд дапIну ккунду, Табасаран райондин ГьепIил гъулан агьали Багьаудин Абасов му жюрейин спортдин талитариз удучIвури, магьа 16 йис ву. Гьаму вядайин арайиъ думу 23 ражари гъалиб гъахьну ва 8 ражари – магълуб.
Спортдин мярака аьхирихъна гъяйиз цIиб улихьна рингдилан тамашичйирихьна, турнирин хяларихьна ва дидин иштиракчйирихьна райондин глава Мягьямед Къурбанов илтIикIнийи.
«Гъи Табасаран райондиъ спортдин цирклиан аьхю машквар къайд апIура. Гьамциб маракьлу серенжем ихь ругариин тешкил апIбаз ММА-йин спортсменар вердиш апIурайи Гьябиб Нурмягьямедовдин Eagle FC клубдиз чухсагъул мялум апIуз ккундузуз. Кьудратлу спортменар вердиш апIурайи му тешкилатди аргъаж шулайи наслар сагъу уьмрихъ хъаъбаъ аьхю роль уйнамиш апIура. Ухьуз варидиз Аьбдулманап Нурмягьямедов ва вари дюн’яйиз машгьур духьнайи спортсменар вердиш гъапIу дугъан спортдин мектеб кIваинди вухьуз. Учвуз рябкъюрайиганси, гъи гьацдар заан дережайин спортсменарин арайиъ талитар гъахбан бадали, Табасаран райондизра вари мумкинвалар а, ва гьамусдихъантинара гьар йисан му жюрейин турнирар кIули гъахуз учу гьязур вуча», – гъапнийи Мягьямед Къурбановди.
Дугъу турнир тешкил апIбаз кюмек туву Казахстандин «Модернстрой-Атырау» тикилишчивалин компанияйин кIулиъ айи Идрис Гьяжибеговдиз ва дугъан адаш Гьяжибег Аьлибеговдиз чухсагъул мялум гъапIнийи ва, аьхиримжи йисари райондин яшайишдин инфраструктура артмиш апIбаз ва спортдин аьхю серенжемар гъахбаз кюмек туврайивализ лигну, Идрис Гьяжибеговдиз муниципалитетдин гьюрматнан грамота тувнийи.
Чан терефнаан Идрис Гьяжибеговди турнир Табасаран райондиъ гъабхуз разивал тувбаз райондин администрацияйиз ва Мягьямед Къурбановдиз аферин гъапнийи.
Серенжемдин дахилнаъди Мягьямед Къурбановди ули-хьнаси Дагъустандин Огни шагьриъ гьюликк кахьрайидар аьжаликкан ккадагъу ихь ватанагьли Расул Гьюсейновра, гьамциб дирбаш ляхин апIбаз лигну, гьюрматнан грамотайиинди ва главайин ччвурнахъан пешкеш вуди сяаьт тувбиинди лишанлу гъапIну. Расул Гьюсейновдин дирбаш’валикан учу газатдин гъубшу нумрайиъ гьибикIнийча.
