Гьар йисан июндин вазлин шубубпи элгьет вари уьлкйириъ Медицинайин гъуллугъчийин йигъси къайд апIуру. 2023-пи йисан му машквар июндин 18-пи йигъ’ин алабхъну. Ккудубшу жвуми йигъан гьюкуматдин улихь-кIулихь хьайидари, шагьрарин ва районарин кIулиъ айидари, медицинайин гъуллугъчйир му йигъахъди тебрик апIури, ужуди ляхин апIурайидариз гьюрматнан грамотйир ва жара пешкешар тувну.

 

 

Му йигъахъди алакьалу вуди Дагъ. Огни шагьрин ЦГБ-йиъ кIули гъубшу шадвалин серенжемдикан ва Табасаран райондин ЦРБ-йин конференц-залиъ гъабхьи конференцияйикан жикъи мялуматар тувдихьа.

Му йигъахъди аьлакьалу вуди Дагъ. Огни шагьрин ЦГБ-йин гьяятдиъ кIули гъубшу серенжемдиъ шагьрин администрацияйин руководствойин вакил Эльдар Велиевра иштирак гъахьну. Медицинайин цирклин гъуллугъчйир му машкврихъди тебрик апIури, сабпирди шагьрин ЦГБ-йин кIулин духтир Максим Гьяжимягьямедовди гаф гъапнийи.

«Гьюрматлу медицинайин пешекрар, учву гъийин машкврин йигъахъди кIваантIан мубарак апIураза. Вафалувал, фидакарвал, заан пишекарвал ва жумартвал – медицинайин гъуллугъчйириз хас лишнар ву. Ичв гьар йигъандин зегьметниинди инсандин варитIан багьа вуйи уьмур ва сагъ’вал уьрхюрачва. Совет вахтари-хъанмина Дагъ. Огни шагьрин ЦГБ-йиъ ужудар гьюрматлу духтрар лихура кIури, мялум ву. Ухьу варидари сатIиди зегьмет дизигну, гьаму ад дюбхну ккунду. Аьзарлу инсан илтIикIу вахтна лизи халат алабхьу касди сяаьт, вахт дабгну ккундар. Ухьу гьаммишан кетIерццнайи касдиин гюзчивал гъабхури, дугъан сагъламвал дюбхну ккунду, думу ихь вазифа ву. Ухьу ляхин апIури имбукьан гагьди, Гиппократдин аьгьтнан гафнакан гьархну ккундар», – гъапнийи дугъу.

Эльдар Велиевди, шагьрин ЦГБ-йин аьзарлу бицIидарин отделенияйин заведующий ТIагьир ТIагьировди, духтир Амир Шябановди чпин удучIвну улхбариъ, медицинайин гъуллугъчйир му йи-гъахъди мубарак апIури, варидариз жандин сагъ’вал, му читин ляхниъ сабур ва хъуркьувалар ккун гъапIнийи.
Хъасин хайлин медицинайин пишекрариз, асас вуди дишагьлийириз, кюкйирин кунцIарра хъади гьюрматнан грамотйир тувнийи. Серенжем концертдин программа улупбиинди давам гъапIнийи.
16-пи юндиъ Табасаран райондин Мирзамягьямед Мягьямедовдин ччвурнахъ хъайи ЦРБ-йиъ Медицинайин гъуллугъчийрин йигъаз бахш дапIнайи конференция кIули гъубшну. Дидиъ Табасаран райондин глава Мягьямед Къурбановра иштирак гъахьну.
Шадвалин серенжем ачмиш апIури, Абсеретдин Мирзабеговди аьхиримжи йисари республикайин руководствойи ва Табасаран райондин администрацияйи райондин ЦРБ-йиз аьхю фикир туврайиваликан гъапнийи.

«Гьамусяаьт Табасаран райондин ЦРБ-йинсдар уткан дараматар саб райондиъра, шагьриъра адар. Ихь республикайин улихьдин сагъламвал уьбхбан министр Жамалудин Аьлиевич Гьяжиибрагьимовдиз аьхю чухсагъул дупну ккунду. Райондин ЦРБ бадали дугъу гизаф гамар аладагъну. Гъачай, Мирзамягьямед Ханмягьямедович кIваин апIурхьа, дугъу медицинайин коллективдихъди сатIиди ЦРБ-йин ччвур заан дережайиз адапIуз зурба зегьмет гъизигну. Ва гъи ухьу дурарин ляхин давам дапIну ккунду.
Гьаци ихь духтрарира, фунуб кевшандиан агьали гъафишра, думу жара уьлкейиан гъафир ву кIурадар, фуну миллетдин аьзарлу инсан илтIикIишра, заан дережайиъди медицинайин кюмек апIура. Му хъуркьувалар, гьелбетда, узхьан сар касдихьан шлу ляхнар дар, думу ихь сатIи, албагу духтрарин коллективдин гьунар ву. Гъи, мициб йигъан, ич терефнаанра варидариз фикир тувну ккунду. Магьа гъи райондин глава Мягьямед Къурбановра ихь хайлин гъуллугъчйирин зегьмет лишанлу апIуз дуфна. Дугъазра гаф тувдихьа», – гъапнийи Абсеретдин Миразабеговди.

Мягьямед Къурбановди чан удучIвну улхбаъ, дюн’яйиъ ислягьвал, жандин сагъ’вал хьувал ккун апIури, медицинайин гъуллугъчийр пишекарвалин йигъахъди мубарак гъапIну.
«Ичв сагъ’вал – ич сагъ’вал ву. Учву дарш, ич сагъ’вализ фуж лигиди? Духтурвал –эдеблу пише ву. Гьаз мици кIурва гъапиш, гьамусяаьт Украинайиъ кIули гъягъюрайи гъизгъин женгариъ ихь эскрарихъди сабси духтрарира ватан, ислягьвал бадали гизаф зегьмет зигура. Узу гьаммишан саб гам улихьди ичв му машквар мубарак апIуз гьялакди шулза.

Духтир ву, гъапну кIури, дугъазра хизан а, цIибди вушра дугъура рягьятвал гъадабгъну ккунду. Хъа гъи, му ляхнар вари фикриз гъадагъну, узу ва ихь ЦРБ-йин кIулин духтир Абсеретдин Мирзабеговди ичв сатIиди зигурайи зегьмет гьюрматнан грамотйир тувбиинди лишанлу апIуз ва пулин конвертар тувуз мясляаьт гъапIунча. Йиз учвухьна вуйи мициб янашмиш’вал учву зигурайи зегьметназ гьюрмат апIувал вуйиз», – къайд гъапIну райондин кIулиъ айири.

Думу йигъан хайлин йисари зегьмет гъизигу медицинайин гъуллугъчйир райондин админис-трацияйин ва ЦРБ-йин терефнаан гьюрматнан грамотйир тувбиинди лишанлу гъапIнийи.