Дербент шагьриъ ерлешмиш дубхьнайи 18-пи нумрайин Вари дюн’яйин культурайин гимназияйиъ урхурайи Аьйшат Гьясанова улихьна йигъари Кафари Кавказдин федеральный округдин урхбаъ заан натижйир ва хъуркьувалар улупурайи БицIидарин энциклопедияйиз гъадагъну, ва дугъаз тялукь сертификатра тувну.

 

 

Аьйшат Гьясанова 2005-пи йисан Табасаран райондин ТинитI гъулаъ бабкан гъахьну. 2012-пи йисан дурарин хизан Дербент шагьриз кючмиш шулу, ва гьадму йисан Аьйшат 18-пи нумрайин гимназияйин 1-пи классдиз гъягъюру.

Ккергъбан классариан хъюгъну, Аьйшатди, жюрбежюр конкурсариъ, талитариъ, олимпиадйириъ иштирак шули, заан хъуркьувалар улупури гъахьну.

Аьйшатдин йицIисад йисан гимназияйиъ урхбан натижйирра ужудар ву. Гьамусяаьт дугъу саб вуйи гьюкуматдин имтигьнар тувра. Урус чIалнаан ЕГЭ 85 баллиз, химия – 90 баллиз, математикара «хьубдиз» тувну. Биологияйиан ЕГЭ-йин натижйир 28-пи июндиъ ашкар хьиди. Аьйшатдин дада Зумруд Исабеговнайи, шаклу хьуб лазим дар, дугъу думу имтигьяндианра ужуб кьимат гъадабгъиди кIури, умудлуди къайд гъапIнийи.

Аьйшатдин уьмрин метлеб – хирург духтир хьувал ву. Гъит ихь бажаранлу риш чан кIваъ айи вари хияларихъ хъуркьри, уьмриъ дугъаз ягъурлу рякъ ибшри.