Гъубшу гьяфтайиъ Табасаран райондин цIийи модельный библиотекайиъ Расул Гьямзатовдин юбилейиз бахш дапIнайи серенжем кIули гъубшну. Табасаран шаир Гюлбика Уьмаровайин мектебариъ урхурайи баяр-шубарихъди вуйи литературайин мяракайиъ райондин глава Мягьямед Къурбановра иштирак гъахьну.

 

 

Къайд дапIну ккундуки, машгьур табасаран шаир, Урусатдин писателарин союздин вакил Гюлбика Уьмаровайи 2016-пи йисан гъибикIу «ЧIалнан ядигар» китабдиз Расул Гьямзатовдин ччвурнахъан вуйи премияйиз тувнийи. Дидланра савайи, дугъу Расул Гьямзатовдин «Йиз Дагъустан» китабдин кьюб томра, вари дюн’яйиз машгьур «Кьарнийир» шиирра ихь чIалназ илтIикIну, ва гъи думу шиърин гафариз Дагъустандин лайикьлу артист Аьбдуллагь Мирзакеримовди мяълира апIура.

Мягьямед Къурбановди Гюлбика Уьмаровайи табасаран чIал артмиш апIбак киврайи аьхю пайназ ва дугъу литературайиъ гъазанмиш дапIнайи хъуркьувалариз заан кьимат тувнийи.
«Расул Гьямзатовдин «Йиз Дагъустан» гьаму заманайиъ гьарсар касдин столиин алди ккуни китаб ву. Думу табасаран чIалназ таржума апIбиинди уву ихь чIал, культура хъана девлетлу гъапIунва. Александр Пушкиндин ва Расул Гьямзатовдин эсерар ва шиърар таржума апIуз удукьувал анжагъ машгьур шаирарихьантIан шлу ляхин дар», – гьапнийи райондин кIулиъ айири.

Серенжемдиъ мектебариъ урхурайи баяр-шубари, библиотекайин вакилари Гюлбика Уьмаровайи ва имбу табасаран шаирари Расул Гьямзатовдин ихь чIалназ илтIикIнайи шиърар гъурхнийи. Мярака лап маракьлуди кIули гъубшнийи ва варидариз кьабулра гъабхьнийи, иллагьки бицIидариз.

Серенжемдиъ Гюлбика Уьмаровайи чан, жюрбежюр йисари чапдиан удучIвнайи къабтIан артухъ китабар модельный библиотекайин фондназ багъиш гъапIнийи. Багарихьди библиотекайиъ шаирин яратмиш’валариз бахш дапIнайи мурччвра ачмиш апIиди.