Гьаму йигъари Мягьячгъала шагьриъ кIули гъубшу вари Урусатдин «Урусатдин ляхин» азад гъуллугъарин ярмаркайин кьюбпи пайнаъ Дагъустандин сагъламвал уьбхбан министерствойи дагълу гъулариъ лихуз ккуни медицинайин гъуллугъчйирихъди районарин медицинайин идарйириъ айи лихру йишвар таниш гъапIну.
Республикайин минздравди тешкил дапIнайи майдандиин кIули гъабхурайи ляхнихъди, асас вуди республикайиъ сагъламвал уьбхбан цирклиъ фукьан кьадар пишек-рар гьуркIрадарш, духтрар гьуркIри адру больницйир фундар вуш, «Земский духтир» программайи республикайиъ фици ляхин гъабхураш, РД-йин Правительствойин председателин заместитель Аьбдурягьман Мягьмудовра таниш гъахьну.
Къайд апIуб лазим вуки, «Земский духтир» программа гьяракатнаъ ипхъанмина рес-публикайин дагълу районарин ва бицIи шагьрарин больницйириз 1815 духтир ва кьялан медицинайин 93 гъуллугъчи жалб гъапIну.
«Табасарандин нурар» газатдин машариъ 3 ваз мидиз улихьнара учу «Земский духтир/фельдшер» программайин гьякьнаан кьатI’и мялуматар тувнийча. Гьадмуганси, гьамусра программа уьмриз кечирмиш апIбаъ дигиш’валар духьнадар. «Земский духтир» программайиъ дидин иштиракчйирин яш гьисабназ гъадабгъурадар. Ккунди айиб – лихуз гъюрайи кас улупнайи азад гъуллугънан пишекар вуди хьуб ва дагълу райондиъ вая 50 агъзурихьна инсанар яшамиш шулайи бицIи шагьриъ лихуз аьшкь ади хьуб ву. «Земский духтир» хьуз ва думу программайин дахилнаъди туврайи пул гъадабгъуз анжагъ саб ражаритIан шулдар. Ляхниъ дийигъбан кьяляхъ духтрари 1 миллион манат, фельдшерари – 500 агъзур манат гъадабгъиди. Муниципалитетарин кIулиъ айидариз ляхниз гъюрайи цIийи пишекрариз вари терефариан кюмек тувуб табшурмиш дапIна.
КIваин апIуз ккундучуз, Табасаран райондиз 15 духтир гьуркIрадар. Дурарин гьисабнаан Хюрикк, ТинитI, Къужник ва ТIюрягъ гъулариз участокдин терапевтар лазим ву, хъа райондин ЦРБ-йиъ нарколог, эндокринолог, рентгенолог, анестезиолог, травматолог ва жара духтрар гьуркIрадар.
Хив райондикан улхуруш, ЦРБ-йин кIулин духтир Индира Багъичевайи къайд гъапIганси, больницайиъ 8 духтриз ляхнин азад йишвар а.
Республикайин медицинайин цирклиъ айи азад гъуллугъарин гьякьнаан РД-йин минздравдин сайтдиъ «Деятельность» разделин «Земский духтир» подразделиъ мялуматар гъадагъуз шулу.
