Дагъустандин Огни шагьриъ яшанмиш шулайи Гьяйбуллагь Гюльмягьямедовди чан уьмриъ сагъу рякъ дибисну гъягъюра. Думу юкьяр дисбаан спортдин жюрейиин машгъул ву. Гьамусяаьт 25 йисаъ айи Гьяйбуллагь Ставрополин олимпиадайин дакьатарин мектебдиъ талитарихьна гьязур шула. ЦIиб улихьнаси, майин вазлиъ, юкьяр дисбаан Каспийскдиъ кIули гъубшу, 5 ражари дюн’яйин чемпион гъахьи Аьли Аьлиевдин гьюрматназ вуйи вари халкьарин турнириъ думу кемшрин медализ лайикь гъахьну. Дидланра савайи, Гьяйбуллагьди юкьяр дисбаан урусатдин ва вари халкьарин арайиъ вуйи турнирариъ швнуб-саб ражари пешкешнан йишвар гъазанмиш дапIна.

 

 

Гьяйбуллагь Гюльмягья-медовдин абйир-бабар Хив райондин Асккан Яракк гъул’ан ву. Эвленмиш духьну бицIи вахтналан дурар Саратовский областдиз удучIвну гъягъюру, ва 1994-пи йисан Гьяйбуллагь гьаду-шваъ бабкан шулу. Балин хьуд йис вуйиган, абйир-бабар Дагъустандин Огни шагьриз кючмиш шулу.

Гьяйбуллагь бицIи вахтнахъанмина спортдиин аьшкьлу духьнайир ву. Дугъу юкьяр дисбаан спортдин сирар тренер Иса Эскеровдин хиликкди аьгъю апIуз хъюгънийи. Бажаранлу жигьили Огни шагьриъра, республикайин дережайин талитарира 1-2-пи йишвар гъадагъури гъахьну. Хъасин Иваново шагьриъ лап адлу ва бажаранлу тренер Гьясанов Гьясан Мягьямедович айиб аьгъю гъабхьиган, Гьяйбуллагь, дугъахь гьязур хьуз хъюгъну, ва цIийи тренерин хиликкди саб жерге талитариъра пешкешнан йишвар гъазанмиш гъапIну.

– Узуз бицIи вахтнахъан-мина спортдиин аьшкьлу духьнайир вуза. Гьамусяаьт юкьяр дисбаан Урусатдин сатIи вуйи командайин дахилнаъ айир табасаранарикан анжагъ сар узу вуза. Багарихьди, Аллагьдин амриан, юкьяр дисбаан вари дюн’яйиин чемпионатдиъ иштирак хьидиза.

– Гьяйбуллагь, увуз спортдин рякъюъ варитIан аьхю кюмекчи фуж гъахьунвуз?

– Йиз адаш Багатир ва дада Гюльмира. Узуз адашди гьаммишан лазим вуйи кюмек туври гъахьну. Йиз спортдин хъуркьуваларик абйир-бабарин аьхю пай ка. Дурариз аьхю чухсагъул кIураза. Ва гьацира йиз тренераризра.