Улихьна йигъари РД-йин СМИ-йин журналистарихъди гюрюшмиш духьну, Дагъустан Республикайин энергетикайинна тарифарин министр Марат Шихялиевди республикайиъ уьмриз кечирмиш апIурайи, агьалйирин хуларихъна пулсузди газ зигувалин федеральный проектдихъди аьлакьалу ва саб жерге жара месэлйирикан ктибтну.
Конференция ачмиш апIури, министри мялум гъапIганси, гъубгу электроэнергияйихъан ва газдихъан туврайи пулин кьадар, аьдат вуйиганси, гьар йисан 1-пи июлиан артухъ шулайивал цци давам гъабхьундар. Дугъан гафариинди, ЖКХ-йин тарифарин кьадар гъюру йисазкьан артухъ апIидар.
Хъа газ зигбан проектдин гьякьнаан Марат Шихялиевди къайд гъапIганси, гъийин йигъаз, проектдиъ иштирак хьпан бадали, республикайин агьалйирихьан 6 агъзуртIан артухъ аьрзйир дуфна. Гьаму кьадарнакан хуларихънакьан газ дизигну ккудубкIнайидарин кьадар 1200 ву, хъа 977 аьрза, гьуркIну документар адрувализ лигну, кьяляхъ гъапIну.
«Хуларихъна газ зигбан программа вахт улупнайиб дар. Янаки хайлин йисарин арайиъди хулар тикмиш апIурайи касдихьанра, душваъ иштирак духьну, чан хулар тикмиш апIайиз газ дизигну, гьязурди гъибтуз шулу. Гьаму йисхъантина жямяаьтлугъ идарйиризра, гьаму гьисабнак образованиейин ва медицинайин идарйирра кахьра, программайиъ иштирак хьуз мумкинвал а.. Гьамусяаьт дицдар 43 идарайи учухьна аьрзйир тувна.
Думу идарйириъ гьамусдизкьан кIару гъвандин ва электроэнергияйин кюмекниинди манишин апIури гъахьну.
Сабсана пуз ккундузузки, программайин асас вазифа – агьалйирин хусуси дакьатар ишлетмиш дарапIди, хуларихънакьан – гьюкуматди, хъа хулаз – чав аьрза туву касди газ зигувал ву.
Мисал вуди гъадабгъиш, хулар дивнайи участокдин сяргьятарилан хулазди газ зигбан бадали, 30 агъзур манат, хъа газдихъди хулар мани апIру вая лазим вуйи жара жюрбежюр алатар масу гъадагъбазра хъана 70 агъзурихьнакьан хусуси дакьатар харж хьибди», – кIура Марат Шихялиевди.
Журналистарин суалариз жаваб туври, министри гъапиганси, уьмриз кечирмиш апIурайи программайиъ хусуси метлеб айи дявдин опрерацияйиъ иштирак шулайидарин, касибвал кайи, инвалидарин хизанариз льготйир тувувалра фикриз гъадабгъна. Министрин гафариинди, дициб жюрейин агьалйири харж гъапIу хусуси дакьатар субсидйирси кьяляхъра тувра. Гъийин йигъаз аьрза тувдарикан 44 аьрзачийи харж гъапIу чпин дакьатар кьяляхъ гъадагъну. Му жюрейин субсидия анжагъ сад хуларихъ ва саб ражаритIан туврайиб дар, ва дидин кьимат 100 агъзуртIан артухъ дубхьнура ккундар.
Конференцияйиъ министри мялум гъапIганси, гьаму йисан 1-пи мартдихъанмина, эгер льготйир айи касариз лазим вуйи алатар масу гъадагъуз хусуси дакьатар адарш, дурариз дишлади думу конпенсация тувра.
