Лиманат Эмурбегова 1975-пи йисан ТIюрягъ гъулаъ бабкан гъахьну. Мектеб ккудубкIбалан кьяляхъ дугъу аьдати табасаран дишагьлийирин кеспи – халачичивал апIуз хъюгъну.
Сабпи шиърар Лиманат Эмурбеговайи гьеле мектебдиъ урхурайи вахтна гъидикIну. Хъа 2022-пи йисан Мягьячгъалайиъ дугъан «Мюгьюббат» ччвур али шиърарин сабпи китаб чапдиан удубчIвну. Дугъу гъидикIу хайлин шиърарин гафариз гъи табасаран артистари меълийир апIура.
Улихьнаси, Дагъ.Огни шагьрин БицIидарин яратмиш апIбан хулаъ Лиманат Эмурбеговайин китабдин презентация гъабхьну.
Газат урхурайидар ихь таза шаирин сабпи китабдиан вуйи бязи шиърарихъди таниш апIурача.
Лиманат Эмурбегова
«Мюгьюббат» китабдиан
Мюгьюббат
(Мяъли)
Мюгьюббатдиз адар яшлур, я жигьил.
ЮкIв улубкьур машгъул шулу уьмриин.
Аьшкьниинди йигъар хъаъру дюн’яйиин
КIваъ уву айи касди, мюгьюббат.
Текрар бенд:
Ай, фукьанна ширин дарна, мюгьюббат!
ТIирхуз паплар кIвак киврува, мюгьюббат!
Кум алдарди ялвигъ гъитру мюгьюббат,
Пагь фукьанна яман дарна, мюгьюббат!
Мюгьюббат даршир дюн’яйилан гъушиган,
Дицир касдиз бахтавар кIуз шулийкIан?
Увкан хабар дарши кас думу вуйиган,
Хабарсузди ялвигъ гъитру мюгьюббат.
Наан ава, ккунир?
(Мяъли)
ГвачIнин ккивру уьру ахсрар,
Ккилигури шулза гьарган,
Учвукьан хур дупну хабрар
Му йиз юкIв али ярикан.
Вари дюн’я рябкъюрайи,
Завуъ айи аку вуй ригъ,
Гьерхри аза, жаваб тув зуз,
Йиз ккуни яр рякъюрануз?
Улар уьлчIюкьну тIаайиз,
Дюн’яйилан илбицру микI,
Начдисира вузуз гьерхуз:
Йиз ккуни яр алахъунвуз?
Текрар бенд:
Ригъарина вазарикьан,
Гьерхишра, жаваб туврадар.
Я думу гъяркъю кас адар,
Яраб думу наан айкIан?
Йиз велед
Варибдикан ктабтIу умуд
Увук кайиз жил’ин, велед.
«Дада» гъапи ширин сесну
Йиз юкIв рази гъапIну, велед.
Жан дадайиз айи саб юкIв,
Гьаммишан шадди гъитрива.
Уву наана гъушишра,
Аьмаллу салигьди гъузрива.
Варидин кIул дюн’яйиин
Бахт айидаркан ишрива!
Аллагьдикан ккун апIурза,
Сагъди ва шадди ишрива!
Аьхюр-бицIир ади гъуза,
Ккебгъигана яв хал-хизан.
Девлет-берекет ишривуз,
Варидарин гъуллугънаъ хьуз!
Армияйиъ айи бализ
Армияйиз душну гъяйиз, кьюд йисан
Фици увуз ккилигуза, жан масан?
Диришри гьауз шуйкIан узхьан вахтар?
Кьит хьидикIан яраб дадайин улар?
Йишвну ширин нивкIуз узу гъушубси,
Уларикк гьарган ву ккайиз йигънуси.
Йигъ гъабхьиган, жан бай, яв гюзел сурат
Дивну улихь шулза дада ишури.
КIваз рягьят шуйиз, ву багахь хьайиси,
Уликк ккайган сурат, лигру гюзелси,
ТIирхуз шуйиш узхьан завуз, ппазиси,
Зав’ан икрам апIуйзавуз дадайи.
Шуран цIийи хал
Фикир тувай, абйир-бабар,
Учву риш швуваз тувруган,
АпIурай ергру ялхъван дар –
Шуран йигъ аьжуз мапIанай!
Алабхъиш хас дару хизан,
Кьяляхъна шидичва пашман,
Кьан дубхьну фукIа гьюдюхюз,
Йигъ аьжуз апIарчва шуран.
Сабсан кIузачвуз, хъебехъай,
Риш даккун мутуванай,
Тувну ккуни йишваз бахтлу,
АпIинай думу шад, варлу.
ГъапIу вахтна ичв риш бахтлу,
Шидичва учвура адлу.
Гъавум-гъардашра ишри шад,
Тувди учвуз дурари дад.
Ичкийин гъуллугъчийиз
Миннат вуйиз, мубхъан, инсан,
Пуч мапIана яв жигьил жан.
Ичкийиз гъуллугъ апIури,
Миккидипан му яв хизан.
Убхъбу ушвниин илитган,
Халкьдира няъна алапIур,
Хал ккидипур шибритIиан,
Адар диди уж’вал гъапIур.
Хулхьан дапIну хизан фархи,
Айи велед гъюлягъ гъитну,
Агъусиб яман арагъи
Вувуз веледтIан багьалу.
Гъубхъу вахтна вува кIубан,
Гъягъюрва лап яман кIул’ан,
Вари айиб дапIну талаф,
Гъюрва хулаз «гъяраф-гъяраф».
Шадди гьаай йигъар, дустар!
Гъи гъубшу йигъ закур гъюрдар,
Фици вушра йигъ гьапIруб дар,
Гъягъюрайдар жигьил вахтар –
Шадди гьаай йигъар, дустар!
Ул илтIибкIай дюн’яйилан,
Ккун апIинай Аллагьдикан,
Жигьил уьмур дархьуз пашман.
Шадди гьаай йигъар, дустар!
Кюкю дапIнай хьадукран вахт –
Гьациб ву жигьилвалин бахт,
Варибдикан фикирлу вахт –
Шадди гьаай йигъар, дустар!
КIваз сабурвал, жандин сагъ`вал
Аллагьдикан ккун апIинай.
ЧIуру, пашман, дердлу йигъар
Ярхла апIри ухьхьан, дустар!
