Дербент шагьриъ ерлешмиш дубхьнайи Лезги театриъ 5-пи июлиъ табасаран шаир ва драматург Эльмира Аьшурбеговайин пьесайин бинайиин урус чIалниинди дивнайи «Даимлугъ дигиш шулайиган» («Когда меняется вечность») кIуру спектакль улупну. Спектаклиз, думу ляхин апIурайи йигъан сяаьт кьюбдиъ улупурайивализ дилигди, Дербент ва Дагъ. Огни шагьрариан жюрбежюр миллетарин гизаф вакилар дуфнайи. Гьелбетда, дураригъ хайлин табасаранарра гъяйи, гьадму гьисабнаан Табасаран театрин вакиларра. Сягьнайин ляхин пишекарвалин терефнаан аьгъюдарин гаф кьиматлу вуди гьисаб дапIну, ихь театрин вакиларикан спектаклин гьякьнаан саб-кьюб гаф пуб ккун гъапIнийза.
Гьацира му жюрейин тIалаб хьади Мягьячгъалайиан спектаклиз лигуз дуфнайи табасаран чIалнан месэлйириин лихурайи аьлим Шарафудин Дашдемировдихьнара илтIикIнийза. Дугъу му спектакликан кIулди макьала гъибикIнийи, думура исихъ туврача.
Жанбулат Гьябибов, Табасаран театрин кIулин режиссёр:
– Му спектакль Эльмира Аьшурялиевнайин драматургияйин рякъюъ сабпи ляхин дар, улихьна дугъан кьюб пьеса Табасаран театрира дивна, Лезги театри дивнайиб шубубпи спектакль ву. Табасаран драматургияйиз му фукьан-вушра аьхю хъуркьувал ву.
Спектакликан кIурайиб давам апIури, пишекар терефнакан улхуруш, улихьдин йисарихь тевиш, пьеса дудубкьна, гьарсаб апIурайи гафниинди, гьарсаб гьяракатниинди автори гизаф ляхин дапIнайиб аьгъю шула.
Спектаклиъ гъийин заманайин уьмриъ айи терроризм, вари терефарихъанди важиблу вуйи жара месэл-йир атIагна. Набалугъ жигьилар, пул ва фукIа жара хайир гъябкъю вахтна, дигиш духьну, дюз дару рякъюъди гъягъюрайивал ва думу ляхни зарар ва дердар хурайивал улупна.
Гюльниса Агъаева, Табасаран театрин актер дишагьли, Дагъустан Республикайин лайикьлу артист:
– Узу спектаклиз, ил хътадабгъри лигурайиси, аьхю аьшкьниинди тамаши гъапIнийза. Гьамциб эсер бикIбаз Эльмирайиз чухсагъул! Му спектакль вари кюлфетарихъди сатIиди лигуз лайикьлуб ву. Дидик гъийин читин заманайиъ ихь жигьиларин уьмриъ шулайи гьядисйир, жигьиларин шлихъди дуствал аш, дурарин кIул’ина фу гъюз мумкин вуш, ачухъди улупна. Спектакли дидиз лигурайирин фикир аргъаж шулайи насил хатIалубдихьан ва харжибдихьан ярхла апIбахьна, тахсир ктрудар балайикк ккадрахьуз чалишмиш хьпахьна жалб апIура. Му спектаклиз вари студентариз ва мектебариъ урхурайидариз теклиф дапIну ккундийи.
Аьбдуллагь Мирзакеримов, Табасаран театрин актёр, Дагъустан Республикайин лайикьлу артист:
– Эльмира Аьшурбегова гизаф бажаранлу шаир ву. Дугъу бикIурайи шиир вушра, пьеса вушра, вари терефарихъанди фикрин дигмиш’вал ади, дюзуб шулу. Дугъан вари темйир гъи ихь аьхю шулайи наслариз тербия кайидар, гъийин девриз хас вуйидар ву. Гьаддиз дугъан пьесайин бинайиин дивнайи гьаму спектаклизра узу аьхю аьшкьниинди гъилигунза, ва узуз думу гизаф кьабул гъабхьунзуз. Гьаз гъапиш, дугъу гьаму заманайиканра, жигьилариканра, вари терефарихъанди фикир дапIну, дибикIна. Му гъийин заманайин жигьилариз лап лазим вуйи, мяналу спектакль ву.
Аким Сяидялиев, Табасаран театрин актёр, Дербент шагьрин жигьил депутатарин парламентдин председателин заместитель:
– Узхьан гьаму спектаклиз лигуз гъабхьивалиин гизаф рази вуза, гьаз гъапиш спектакль гизаф ужуб ва дидиз лигбан кьяляхъ гизаф фикир апIуз гъитруб вуйи. Думу фтикан ву ва дидин мяна фициб ву гъапиш, узу гьамци гъавриъ ахъунзу: ухьуз гьамсяаьт вари дюн’яйиъ ва ихь гьюкуматдиъ айи гьял фициб вуш, рябкъюрахьуз – ихь гьюкумат гужниинди гъадабгъуз даршулайи вахтна, гъирагъдилан интернетдин, соцальный сетарин кюмекниинди ихь жигьилар пуч апIуз, дурар чIуру рякъюъlb гьауз чалишмиш шулайидар гизаф а. Гьяйифки, хайлин хизанариъ айи жигьилариз зулмарра гъяркъну. Му спектакль кьатI’иди гьацдар инсанарикан, шлихъ-вушра хъебехъну, чIуру рякъюъди душну, фици жвуван инсанариз зулум тувраш, гьаддикан ву. Дугъриданра, му спектакль ихь рес-публикайиъ яркьуди улупну ккунду. Лезги театри думу хайлин йишвариъ улупидира ву.
Ихь жигьиларикан нубатнан ражну му спектакль улупру вахтна, театриз дуфну, дидиз лигуб ккун апIураза.
