Улихьни йигъари Табасаран райондин Улуз гъулан дишагьли, 10 бицIир тербияламиш гъапIу баб Гюлхалум Ражабова Бабан орден тувбиинди лишанлу гъапIну.
Дагъустандин Глава Сергей Меликовдин табшуругъниинди, гьюкуматдин му багьалу пешкеш багъиш апIуз Табасаран райондиз Дагъустан Республикайиъ бицIидарин ихтиярар уьрхбаан вари ихтиярар айи вахтна Марина Ежова гъафнийи. Вари Урусатдин Хизандин, ккунивалин ва вафалувалин йигъан багъиш гъапIу думу орден фунур дишагьлийизра аьхю пешкеш ву. Серенжемдиъ Табасаран райондин глава Мягьямед Къурбанов, дугъан заместитель, Къужник гъулан глава Несредин Къурбанов ва жарадар иштирак гъахьнийи.
Къайд апIуб лазим вуки, Бабан орден – му баб-дишигьлийирин статус ва яшайишдиъ дурари уйнамиш апIурайи роль за апIбан метлеб ади тасдикь гъапIу гьюкуматдин пешкешси гьисаб шула. Гьацира Дагъустандиъ думу орден тувбиинди гъудубкьу хизан арайиз гъабхи, хизандин институт мюгькам апIурайи, 10 ва артухъ бицIидариз ужуб тербия туву дишагьлийир лишанлу апIура.
Мягьямед Къурбановди, дуфнайи хялар къаршуламиш апIури, дурар Гюлхалум Ражабовайихъди таниш гъапIнийи.
«Гьюрматлу, Гюлхалум Мягьму-довна. Уву лайикьлуди уьмур хъапIу, ужур зегьметкеш, нумунади улупуз шлу баб-дишагьли вува. Увуз уьмриъ фукьан вушра читинвалар алахьунвуз ва гизаф зегьмет зигувал алабхъунвуз. 10 велед арайиз адагъувал – му аьхю ва гизаф жафа тIалаб апIру ляхин ву. Совет вахтари Табасаран райондиъ 10 ва артухъ бицIидар айи хизанар 800-дихьна айи. Ихь бабар вари ляхнар апIузра, гьадму аьхю кьадар бицIидар уьрхюзра хъуркьуйи. Учу, гъийин насли, думу бабариинди дамагъ апIурача. Гъийин наслиз нумунади улупуз шлу яв бабвалин зегьметназ чухсагъул кIурача», – гъапнийи муниципалитетдин кIулиъ айири.
Пешкеш багъиш апIурайи вахтна, тебрикнан гафар кIури, Гюлхалум Ражабовайихьна Марина Ежовара илтIикIну.
«Баб хьувал – му хусиси гьюрмат гъазанмиш апIувалин лишнарикан гьисаб шула. Хъа вари сифте хизандилан, ужуб тербияйилан ккебгъру. Табасаран район чан аьхю хазанариинди, хялар кьабул апIуз аьгъювалиинди, ужудар инсанариинди адлу ву. ИкибаштIан, веледар аьгьвалатнан дережайихьна вердиш шула. Деврин хизанариз аьхю хизан арайиз хуз, чпиз гизаф бицIидар духьну ккундушул, амма дурариз веледар гележегдиъ яшайишдин дакьатарихъди тямин апIуз даршлувалихьан гучI ка. Ич метлеб — гизаф бицIидар айи хизанариз кюмек апIувал вуйич. Гъи аьхю хизанариз гьюкуматдин терефнаанра фикир тувра. Белки гьадди бицIидарин кьадар артухъ хьуз кюмек тувур. Гюлхалум Мягьмудовнайиз сагъ’вал, чан багахьлуйирин арайиъ шаду ва бахтлу ярхи уьмур ккун апIураза», – гъапну Марина Ежовайи.
Гюрюшдиъ Гюлхалум Ражабовайи чакан, чан уьмрикан ктибтну. Думу учвра 1948-пи йисан Улуз гъулаъ гизаф бицIидар айи аьхю хизандиъ бабкан гъахьир ву. Ерли мектебдиъ дугъу 5-пи классдизкьан гъурхну. Гьадму вахтнан вари бицIидариси, думура хулан ляхнариин машгъул гъахьнийи. Сифте колхоздин ляхнариин, хъасин 25 йисан халачйирин фабрикайиъ гъилихну. Чан жилир Ражаб Ражабовдихъди сатIиди дугъу 10 велед (7 риш ва 3 бай) аьхю гъапIну ва варидариз ужуб тербия тувну. Дурар уьлкейин жюрбежюр шагьрариъ яшамиш шула. Гюлхалум бабаз 20-тIан артухъ худлар ва 10 гудул а. Гъи думу чан бицIину балихъди ва дугъан хизандихъди яшамиш шула. Хизандиъ дугъаз аьхю гьюрмат а. Чан яшайишдиин думу разиди ву. Яшариз лигну, Гюлханум баб саб дакьикьайиъкьан сикинди деъну гъузудар, дугъу гьаммишан хизандиз чахьан шлу кюмекар апIури шулу.
