Хив райондин имамарин советдин председатель Шябан Салигьовдин теклифниинди, райондиз Дагъ. Огни шагьрин Мягьямед Ярагъийин ччвурнахъ хъайи медресейин мялим Ибрагьим аз Зубаджи хялижвди дуфна. Думу чан хизанра хъади гъябгъюрайи вазлин аьхиризкьан райондиъ гъузди.

 

 

Аьгъювалар гъадагъуз юкIв хъайи ва иштагь айи касдиз гьич саб вахтнара кьан дар кIуруганси, Ибрагьим аз Зубаджи Альяманийиз Хив райондиз теклиф апIбан асас метлеб — райондин гъуларин имамарин ва агьал-йирин диндин аьгъювалар ахтармиш апIури, дурарин гъалатIарин зиин лихбан ва цIийи аьгъювалар тувбан курсар кIули гъахувал ву.

Учв Ибрагьим аз Зубаджи вари дюн’яйин хафизарин ассоциацияйин член, шейх, Кьур’андин марцци келимйир йицIуб жюрейиинди урхру аьяндар ва аьлим кас ву.

Гьаму йигъари дугъу, райондин имамарин советдин председателра хъади Хив райондин гъуларин мистариз гъягъюри, динагьлийирин гъавриъ адру суалариз жавабар тувуз чарйир агури, дюз рякъюъди душну ккуниваликан насигьятнан мисалар хури, агьалйирин гъалатIариин лихури, абйир-бабарихьна, аьхюр-бицIирихьна вуйи рафтарикан, бедендик шикаствал кайи ва агьли касарин гъайгъу дизигну ккунивалин гьякьнаан, хатур-гьюрматнакан, инсандин гъавриъ ва гъадриъ хьувалин гвачIин-хябяхъдикан, чIуруб гъапIуриз жаваб тувуз кьаст дапIну даккниваликанва гь.ж. дарсар тувди.
Мициб аьяндар булагъ райондиъ имиди вари шид убхъуз хъуркьди пну, умуд кивраза.