19-пи июлиъ «Дагестанская правда» газатдин редакцияйиъ Москвайиъ ерлешмиш дубхьнайи «Дагъустан» культурайин центрин кIулиъ айи Арсен Гьюсейнов республикайин СМИ-йин вакиларихъди гюрюшмиш гъахьну. Пресс-конференцияйиъ «Дагъустан» культурайин центрин багахь хьайи«Дараччи» дишагьлийирин клубдин Москвайин филиалин кIулиъ айи Марьям Каландаровара иштирак гъахьнийи.
Арсен Гьюсейновди Москвайиъ Дагъустандин вакилвалин регьберваликкди «Дагъустан» культурайин центр тешкил дапIну 35 йис тамам шулайиваликан гъапнийи. Дугъу къайд гъапIганси, сифте думу тешкилатдин дахилнаъ айидар вузариъ урхуб ккудубкIбан кьяляхъ гъузу илимдин, культурайин, медицинайин вакилар, военный гъуллугъчйир вуйи. Дупну ккундуки, Москвайиъ айи «Дагъустан» культурайин центри гизаф йисарин арайиъ Москвайиъ яшамиш шулайидар Дагъустандин халкьарин культурайинна художествойин ирснахъди таниш апIбак лайикьлу пай кивра. Центри дагълуйирин тарих, аьдатар ва гьацира Дагъустан вари дюн’яйиз машгьур гъапIу шаирвалин ва искусствойин устадарин ччвурар намуслуди уьрхюра. Думу гьацира меркездиз гъафи дагъустанлуйириз бицIи Ватандихьна вуйи ккунивал уьбхюз, алахьу читинвалариан кIул адабгъуз кюмек тувру, багъри йишварихьан ярхлаъ айи вахтна рюгь за апIру центр ву.
Гьаму йисан культурайин центри Расул Гьямзатовдин 100 йисандин юбилейихъди аьлакьалуди Москвайиъ кIули гъахурайи вари серенжемариъ иштирак’вал апIура. Центри чахьан удукьру жюрейин кюмекра тувра. Дуфнайи хялари культурайин центр лап багарихьди Дагъустандин чIалариинди тотальный диктантар гъахуз гьязур шулайиваликанра ктибтнийи.
1989-пи йисан, Москвайин шагьрин советди ва Москва шагьрин образованиейин департаментди кюмек апIбаз лигну, «Дагъустан» культурайин центри уьмуми образованиейин 28-пи нумрайин мектебдин бинайиинди Москвайинна Дагъустандин элгьет йигъандин «Намус» кIуру мектеб ачмиш гъапIнийи. Мектебдиъ гьамусра, бабан чIал дубгъуз ккунидариз, дагъус-тан чIалариинди дарсар кивра, милли искусствойихъди, культурайихъди таниш апIура, милли аьдатар кIваълан гьархуз гъитрадар.
«Москвайин «Дагъустан» культурайин центр» региондин жямяаьтлугъ тешкилатдин президент Арсен Гьюсейнов авиацияйинна ракетйирин техникайин проектар гьязур апIру, думу проектарин мянфяаьтлувализ кьимат тувру цирклиъ чIатху пишекар, техникайин илмарин доктор, профессор, Урусатдин дявдин илмарин академияйин академик ву. Думу 1938-пи йисан Дагъустандин Лак райондин Чукна кIуру гъулаъ бабкан гъахьну. 1964-пи йисан Харьковдин авиацияйин институт ккудубкIбан кьяляхъ, космосдин станцйир, ракетйир гъахрудар, паплар кайи ракетйир гьязур апIбан ляхниъ иштирак шули гъахьну.
Думу гьамусяаьт Москвайин авиацияйин институтдиъ «Авиацияйинна ракетйирин гъурулушдин» кафедрайин профессорди, НИР-ин илимдин аьхюну гъуллугъчиди, илимдин руководителди лихура. Арсен Гьюсейновдин ччвур «Ракетйирин ва космосдин техникайин вари халкьарин энциклопедияйиз» гъадабгъна.
Гьелбетда, бицIи Ватандихьан ярхлади яшамиш шулайидариз гьаму жюрейин центр чарасуз лазим ву. Эгер 35 йис улихьна Москвайиъ урхурайи, лихурайи, яшамиш шулайи дагъустанлуйирин кьадар цIиб вуйиш, гьамус дурарин кьадар лапра артухъ дубхьна. Гьаддиз, серенжемдиз дуфнайи хялари республикайин мялуматарин дакьатарихъди аьлакьйир уьрхювал чпин улихь дийигънайи важиблу месэлйирикан саб вуйиб къайд гъапIнийи.
