Гьаму йигъари республикайин важиблу месэлйириз бахш дапIнайи совещаниейиъ Дагъустандин вице-премьер Муслим Телякавовди РД-йин Глава Сергей Меликовдиз мялум гъапIганси, Дагъустандин мектебар цIийи мебелихъди ва деврин лазим вуйи шей’арихъди ва авадлугъарихъди тямин апIбаз 930 миллион манат жара апIиди. Гъийин йигъаз думу авадлугъарикан 70% йишвариина дурукьна.
Гьацира бинайиан расвалин ляхнар кIули гъахру программайиъ иштирак шулайи мектебарин аьтрафар къайдайиз хуз ва хатIасузвал тямин апIбан серенжемариз аьлава вуди 117 миллионтIан артухъ пул жара апIиди.
Къайд апIуб лазим вуки, гъубшу йисан террориз аькси вуйи ва цIа кабхъбан хатIалувалихьан уьрхру серенжемариз мунициралитетариз жара гъапIуб анжагъ 25 миллион манаттIан дайи, хъа мектебарин аьтрафар къайдайиз хпан ва мюгькамди ккабалгувалин ляхнариз затра пул жара гъапIундайи.
