Аьхиримжи йисари Дагъ. Огни шагьриъ дуланмиш шулайидари чпи штухъди тямин апIбаан кми-кмиди читинвалар алухьурайиваликан аьзйир апIура. Мисалназ, хулаъ яшлу, cагъламвалик нукьсанвал кайи касар йидариз, бицIидар хъайи бабариз фикьан вушра читинвал ка.
Шагьриъ штун кьитвал арайиз гъювал фтихъди алакьалу вуш гьерхган, Дагъ. Огни шагьрин водоканалин начальник Фарид Алхасовди къайд гъапIну:
«Дагъ. Огнийи штун месэла мициб читин къайдайихъна гъюбан тахсиркрарси узу шагьриъ дуланмиш шулайи, инсанарин гъайгъушин ктру саспи гьяясуз касар гьисаб апIураза. Гьаз гъапиш, Дагъ. Огни шагьур улихьди аьхю гъул вуйи. Думу гъулаъ фукьан инсанар дуланмиш шулаш гьисабназ гъадабгъну, лазим вуйи кьадар шид гъизигну. Гъулариан кючмиш духьну, аьхиримжи йисари шагьриъ яшамиш хьуз гъюрайидарин кьадарра лап гизаф ву. Дурари варидари хусуси хулар дивра. Гьелбетда, думу хуларихъ бистнарра хъа.
Шид адар кIури, саспи кючйириъ аьрзйир апIурайиган, гюзчивал гъубхунча. Фу лигурва, хусуси хулариъ дуланмиш шулайидари, штухъди бассейнар ацIри, бистнариъ битмиш апIурайи мейвйириз, укIар-кIажаризра кмиди убхъру шид тувра».
– Хъа му месэла фициб жюрейиинди гьял апIурачва?
– Гьар гьяфтайиъ ич идарайин гъуллугъчйир, жюрбежюр кючйириз пай духьну, гюзчивал гъабхурача. Саспи касари шид гъюру кранар ярхи йигъди тIаъну шулу, убхъру шид бистнариъ ишлетмиш апIура. Хъа варидарин хулариъ гъуйир а, гъуйдин шид ишлетмиш апIри. Варидарин гюзчивал апIури ди-йигъуз шлуб дар, гьарсар касди чав фикир дапIну ккунду.
– Саспидари, убхъру штун кьадар гьисаб апIру алат кибтIай кIури, тIалаб апIура. Думу ляхин фици шул?
– Думу месэла гизаф ужуб ву, амма дюз гъюрдар. Гьаз гъапиш, шид гъюрайи турбйир рас апIбан ляхнар шулу, ва гьадмуган сабпну шид деебту вахтна штун илзигувалин гужну думу алат пуч апIуру. Учу жюрбежюр къайдйир ишлетмиш гъапIунча, анжагъ шагьриъ яшамиш шулайидари чпи, инсанвал улупну, шид кьяняаьтлуди ишлетмиш апIури гъахьиштIан му месэла гьял апIуз хьибдар. Гьарурин шид гъюру крандихъ учхьан гюзчивал гъабхуз шулдар. Варидарихьна тIалаб вуйиз, штун кьяняаьт дапIну, имбу инсанариканра фикир апIинай. Учвуз аьхю бистнариъ кивнайи мейвйирихъ, гьарарихъ шид хъубзуз, бассейнар ацIуз ккундуш, гъуйдин шид ишлетмиш апIинай. Гьюлихъ деъну, штун кьяняаьт апIин кIури, ихь абйирин мисал айиб ву. Хъа шагьриъ чан кьадар шид а, анжагъ думу дюзди ишлетмиш дапIну ккунду. Саб идарайизкьан аьрзйир апIбан ляхин адар, чпи шагьриъ яшамиш шулайидари му месэлайин зиин идара гъабхури ккунду.
