Дагъустандиъ хьадан вахтна рягьятвал гъадабгъбан сабпи сменайин бинайиинди июндин 17-пи йигъан республикайин аьтрафариин ерлешмиш духьнайи бицIидарин 12 лагери баяр-шубар кьабул гъапIну. Дагъустан Республикайин мектебариъ урхурайи 1700-тIан артухъ бицIидари лагерариъ рягьятвал гъадабгъуз ва чпин сагъ’вал мюгькам апIуз путевкйир гъадагъну.

БицIидар Къизлар шагьрин «Юность», Гергебил райондин «Березка», Дербент райондин «Южный», УнцIукIул райондин «Сосна», Къарабудагъкент райондин «Анжи-мастер», «Аист» ва «Парус», Къяякент райондин «Надежда» ва «Рассвет», Къяйтагъ райондин «Ореховая роща», Къизилюрт шагьрин «Сулак» ва Шамил райондин «Алило» лагерариъ кьабул гъапIнийи.

Гьаму вари лагерариъ кьатI’и ахтармишар ва гюзчивалин ляхнар кIули гъурхну, дурари санитарияйинна эпидемиологияйин тIалабариз ва цIа кабхъбан хатIалувалихьан уьрхбан къайдйириз жаваб тувбан, гьацира террориствалин гьяракатарихьан уьрхбан гьякьнаан кьатI’и кагъзар гъадагъна.

2019-пи йисан хьадан сагъламвалин кампания Дагъустандиъ 10-пи июндиъ ккебгънийи. Сабпи фаслиъ сифте вуди чпин ракк-нар 5 лагери ачмиш гъапIну. Республикайин уьмуми сиягьназ сагъламвалин 28 лагер гъадагъна.

Улихьна йисариси, гъябгъюрайи йисанра, лагерариз путевкйир республикайин гизаф игьтияжар гьуркIру центрариан (МФЦ) тувру.

Шагьрарин гъирагъариъ, дагълариъ ерлешмиш духьнайи лагерарилан гъайри, бицIидар мектебарин бинайиинди арццнайи йигъандин лагераризра кьабул апIиди.

Сабпи сменайиъ рягьятвал 9,5 агъзур бицIири гъадабгъиди. Дурарикан 6,5 агъзур баяр-шубари шагьрарихьан ярхла айи, хъа 3 агъзуртIан артухъ бицIидари мектебарин бинайиин арццнайи лагерариз путевкйир гъадагъна.