Аьхиримжи вахтари «Табасаран район» МР-иъ райондин айитI вуйи ва Федералин эгьемиятнан рякъяр рас ва цIийи алаъбаз аьхю фикир тувра. Райондин глава Мягьямед Къурбановди улихьнаси къайд гъапIиганси, улихьна йисарихь лигну, гьаму йисан рякъяр рас апIуз пул деебтбан гьялра ужу дубхьна. 

Цци райондиъ ТIивак-ХустIил, Мамедгъала-ТIаттиль-Хючна, райцентрин «Пирар» участокдиан Кьалухъ Мирзайин ччвурнахъ хъайи спорткомлексдихъна, Федералин эгьемиятнан «Кавказ» рякъюн Сиртич-ТIаттиль, Дербент-Хючна-Хив участокар ва жара ерли эгьемиятнан рякъяр рас апIувал улупна.

Дупну ккундуки, Хючна-Хьарагъ рякъхъан Пилигъ гъулаз жара шулайи кьюбна гьацI километр рякъ цIийи алапIбан ляхнар апрель вазлихъанмина ккергъна ва гьяракатниинди кIули гъягъюра. Вари ляхнар подряддин «НЕМО» ООО тешкилатди кIули гъахура.

– Пилигъ гъулаз рякъ цIийи алапIбан ляхнариин, – гъапнийи ич гюрюшдиъ субподряддин «Магистраль 19» ООО-йин кIулин инженер Рамадин Аьзизагаевди, – хусуси метлебнан ургуб аьдад техника ва 10-15 кас механизаторар, рабочйир машгъул ву. Гьелбетда, душв’ин асас ляхнар гъийин деврин «Хитачи 330» экскаваторин (дидихъ лихурайир Казбековский райондиан дуфнайи Рашид Аьгьмедов ву) ва «Шантуй СД26» бульдозерин (дидихъ лихурайир Ахты райондиан вуйи Играм Аьгьмедов ву) кюмекниинди гъахура.

Пилигъ гъулаз вуйи рякъ аьхю лакI йишвар кайиб ва гизаф уз илтIикIбар айиб вуйи. Гьамус рякъюн зул яркьу апIура, лакI’вал ва илтIикIбарин уз цIиб апIура. Июндин 18-пи йигъаз, Рамадин Аьзизагъаевди гъапиганси, саки 700 метр манзилнаъ жилихъди аьлакьалу ляхнар кIули духну ккудукIнийи. Хъа гьелелиг улихь хъана гизаф ляхнар хьми. Бязи участокариъ тIуркIбарра дапIну ккунду. Пилигъна вуйи рякъ рас апIбан ляхнар, графикдиз асас вуди, ноябрь вазлиз давам хьиди.