Мялум вуйиганси, 10-пи июндиъ йишвну Къизлар шагьрин агьалйири шагьрин гъирагъдиъ диву «Чечен Республика Шелковской район» дибикIнайи рякъюн лишан илдипну. Му дюшюшдихъди аьлакьалу вуди аьхиримжи гьяфтайиъ Чечен Республикайихъди вуйи Дагъустандин сяргьятариин аьгьвалат цIиб гъизгъин гъабхьнийи.
Дагъустан Республикайин Калмыкияйихъди, Ставрополин крайихъди, Чечен Республикайихъди, Грузияйихъди, Азербайжан Рес-публикайихъди сатIи вуйи сяргьятар а. Вари гьаму гъуншйирихъди Дагъустандин халкьар аьсрариинди албагну, дугъри гъуншйирси яшамиш шула.
Къайд апIуб лазим вуки, саб халкь ужуб, тмунуб – харжиб шлуб дар. Гьарсаб халкьдин вакиларин арайиъ закурин йигъкан, чав апIурайи ляхни ислягьвализ манигъ’вал тувруваликан фикир дарапIру инсанар шулу. Чечен халкьдикан улхуруш, му дагъустандин халкьариз чвевалин халкь ву. Тарихди субут апIурайиси, читин вахтари ухьу сар-сариз кюмек апIури гъахьунхьа.
Арайиз дуфнайи аьгьвалатнан гьякьнаан улухури, июндин 17-пи йигъан кIули гъубшу Дагъустан Республикайин Халкьдин Собраниейин нубатнан сессияиъ Дагъустандин парламентдин спикер Хизри Шихсяидовди СКФО-йиъ Урусатдин президентдин вари ихтиярар айи вакил Александр Матовниковди Дагъустандинна Чечен Республикайин арайиъ айи сяргьятар жара апIбаан гъабхурайи ляхин дебккбан гьякьнаан къарар адабгъуваликан гъапну.
«Гьаму йисан сяргьятар жара апIбан месэла гьял дарапIуз, думу месэла гъюру йисаз гъибтуз къарар адабгъну. Гъюру йисаз документар ахтармиш дапIну, районарин кIулиъ айидар, жямяаьт му месэла гьял апIбахьна жалб дапIну, ачухъди сяргьятар жара апIувалин ляхин давам апIиди», – гъапну Хизри Шихсяидовди.
Дагъустандин Къизлар райондиъ гъахьи гьядисйирикан улхури, Дагъустандин парламентдин спикери къайд гъапIганси, Дагъустандин халкь – дамагъ кайи лайикьлу халкь ву. Му саризра тасдикь апIуб лазим дар, дидин вари гъавриъ а. Лазим гъабхьиган, 1999-пи йисанра ухьу чвевалин аьлакьйир улупунхьа, хилиъ яракь ади Урусатдин, Чечен халкьдин ва дагъустанлуйирин маракьар гъюрхюнхьа, хъа Дагъустан Республикайин Глава Владимир Васильевди мялум гъапIганси, рякъюн лишан Чечен Республикайин аьтрафариин алди гъабхьну.
Гьелбетда, арайиз дуфнайи аьгьвалатнаъ, Хизри Исаевичди гъапиганси, дагъустанлуйириз саб ляхин кьабул гъабхьундар: му дюшюш арайиз гъафи йишв’ина яракьламиш духьнайи касар хъади гъювал. Мицисдар гьяракатари аьгьвалат хъана гъизигъин апIуб, жигьиларин гьацира «убцIру» ифи имбубсана гьялак апIуб мумкин ву.
Халкьарин арайиъ айи ужудар аьлакьйир саб дакьикьайин арайиъ чIур апIуз шулу. Хъа чIур гъапIу аьлакьйир къайдайиз хпан бадали, швнуд-сад йисар гъягъюз мумкин ву. Гьаддиз ухьу гьарсари, гьаму ляхникан кIваинди гъибтну, Дагъустандинна Чечен Республикйирин жилиин ислягьвал уьбхбак чахьан шлу пай кивну ккнуду.
«Узу йиз гъарашугъарикан, дустарикан арайиз дуфнайи аьгьвалат гъизигъин дарапIувал ккун апIураза, сар-кьюр касди дюз дарди гъапи гафар гьисабназ гъададагъуз дих апIураза. Жигьиларикан сабур апIувал, гьюрмат ади гъузувал, Урусатдин къанунар чIур дарапIувал ккун апIураза», – илтIикIну Хизри Шихсяидов уч духьнайидарихьна.
Дагъустан Республика-йиъра Чечен Республикайиъра аьхюну пай агьалйири Ислам дин хъапIра. Ихь диндира ухьу гъуншйирихьна багахьлуйирихьнаси янашмиш духьну ккунивал, дурарин гьюрмат-хатур уьбхювал тIалаб апIура. Гьаддиз му месэла сар-сариз гиран ктадапIди, ислягьвалин тереф уьбхюри, сабурлуди гьял дапIну ккунду.
