Гъябгъюрайи йисан Урусатдин Федерацияйиъ 780 агъзур выпускникди ЕГЭ тувну. Му улупбар гъубшу йисантIан 50 агъзуриинакьан артухъди ву. Дагъустан Республикайиъ цци ЕГЭ 13 агъзур выпускникди ва 30 агъзур 9-пи классариъ урхурайидари тувнийи. Дурарин гьисабнаъ Табасаран райондиан – 11-пи классдин 418 выпускник ва 9-пи классдин 785 ученик, хъа Хив райондиан – 11-пи класс ккудубкIу 147 ученик, гьацира 9-пи класс ккудубкIу 233 баяр-шубар айи.
Табасаран райондин Халагъ гъулан мектебдиъ цци 11-пи классдиъ анжагъ 3 выпускниктIан адайи. Дурарикан сар Мягьямедяли Сеидов ву.
Июлин 2-пи йигъан Мягьячгъала шагьриз физика предметдиан ЕГЭ тувуз гъафи Мягьямедяли «Табасарандин нурар» газатдин редакция-йизра хялижв гъахьнийи. Дугъу багъри мектебдикан, мялимарин урхурайидарихьна вуйи ижми тIалабарикан, дурарин дарс кивбан бажаранлу тажрубайикан, ЕГЭ-йиъ алахьу читинваларикан ктибтну.
Мягьямедялийин гафариинди, вари йишвариъси, цци Хючна гъулан мектебдиъ гъубху ЕГЭ-ра лап ижми гюзчиваликкди кIули гъубшнийи. «Мектебдиъ, тIагъру дарапIди, аьгъювалар гъадагъиш, ЕГЭ тувуз шулу. Узу, мисалназ, урус чIалнаан 66 балл, хъа математикайиан бинайин имтигьяндиан 4 кьимат гъадабгъунза. Имтигьнар тувбан кьяляхъ, узу Мягьячгъала шагьриъ швнуб-саб университетдиз документар тувдиза. Физика дарснаан имтигьян тувуз гъабхьундайзухьан. Дид’ан лазим вуйи кьадар баллар гъадабгъбан бадали, 9 табшуругъ тамам дапIну ккундийи. Узуз 3 балл гьуркIундарзуз. Закур думу нубатнан ражари тувуз ва ужудар баллар гъадагъуз миж кайиз», – гъапнийи Мягьямедялийи.
Багъри мектебдикан улхури, мялимарин заан пишекарваликан ктибтури, дугъу чаз математикайиан дарсар киврайи мялим Аьбдурафи Аьлиев, урус чIал киврайи Рустам Ражабов ва Руслан Рашидов, обществознаниейин мялим Заутдин Наврузялиев, биологияйин дарс киврайи Вадим Нуров, физика киврайи Камил Пиров жаради къайд дапIну, дурариз варидариз чухсагъул мялум гъапIнийи.
Мягьямедяли швнуб-саб ражари мектебдин, райондин дережайин олимпиадйириъра иштирак гъахьну.
«Узуз жигьилариз теклиф апIуз ккундузуз – урхай, аьгъюваларихъ, вуйиштIан, хъубкьруб фукIара адар. Учу имтигьян туврайи вахтна, сар шураз, фикрариан вуш аьгъдарзуз, дарш гучIбаан, цIиб хяви гъабхьнийи. Думу риш, гьадму йигъан ЕГЭ тувуз дархьиди, жара йигъан имтигьян тувуз мажбур гъахьну. Гьаддиз, ЕГЭ тувуз хьибдар, кIуру фикрарра мапIанай! Узуз, дишди гъапиш, урус чIалтIан математика тувуз гьииди вуйзуз. Фунуб-вушра предмет, дарснаъ айиганси гьисс апIури, гьарсаб табшуругъдиз фикир туври тамам гъапIиш, баллар ужудар хьиди», – гъапну Мягьямедялийи.
Мягьямедяли кIулиъ ади цци мектебар ккудукIу ихь вари жигьилариз чпин кIваъ айи вузарик кучIвувал ва мурад-метлебарихъ хъуркьувал ккун апIурхьа.
