2008-пи йисан июль вазлин 8-пи йигъан Урусатдиъ тасдикь дапIнайи хизандин, мюгьюббатнан ва вафалувалин Йигъ цци ихь республикайиъра яркьуди къайд гъапIну. Му маш-квар хизан уьбхрударси гьисаб апIурайи гирами князь Пётр ва дугъан хпир Феврония кIваин апIбаз бахш дапIнайиб ву.
Му йигъан ихь шагьрариъ ва районариъ гизаф йисариинди албагну, хизандиз вафалуди яшамиш гъахьи хизанарихъди хайлин гюрюшар тешкил гъапIну. Дугъриданра, мюгьюббатна вафалувал адру хизан шид хътру рягъниз ухшар шулу, хъа мициб хизандиъ артмиш шулайи баяр-шубар ригъ ктрубкIри аьхю шулайи укIар-кюкйирсдар вуди шулу.
«Инсандин уьмриин гюзчивал гъайибхай. Бабкан духьну имбу бицIирин гъайгъу дадайи зигуру. ЦIиб вахтналан адашдира дугъан гъайгъу зигуз хъюгъру. Гьаци, аьхю гъахьи бицIидарира чпин абйир-бабарин, багахьлуйирин гъайгъу зигуз хъюгъру ва гъайгъу зигували хизандиъ яшамиш шулайидарин аьлакьйир мюгькам апIуру», – бикIура «Уж’валикан ва утканваликан кагъзар» кIуру, швнуб-саб харижи чIаларизра таржума дапIнайи чан китабдиъ академик Дмитрий Сергеевич Лихачёвди.
Му йигъаз тялукь вуди Дербент шагьрин админист-рацияйин культурайин, спортдин, жигьиларин политикайин ва туризмдин отделин пишекрари тешкил гъапIу серенжемдиъ шагьриъ гизаф йисариинди албагну ва вафалуди яшамиш шулайи хизанар иштирак гъахьну. Гьацира му мяракайиъ Дербент шагьрин главайин заместитель Видади Зейналов, шагьрин депутатарин Собраниейин депутатар вуйи Мягьямед Мягьямедов, Айваз Аьлиханов иштирак гъахьнийи.
«Инсандин уьмриъ хизанди важиблу йишв бисура. Гъийин йигъан му мяракайиъ иштирак шулайи хизанар артмиш шулайи наслариз, шагьрин агьалйириз нумуна вуди яшамиш гъахьну, ва чпин хизанариъ мани аьлакьйир, эдеб, намус, гъир’ят уьрхбан бадали, дурари гизаф чарйир гъизигну. Узу шагьрин глава Хизри Мягьямедовичдин ва вари администрацияйин пишек-рарин терефнаан дурариз хъанара артухъси уж’валар ва сагъ’вал ккун апIурза», ‒ гъапну Видади Зейналовди.
Шагьрин депутатарин Собраниейин председатель Мавсум Рягьимовдин ва чан терефнаан уч духьнайи хизанар тебрик апIури, Мягьямед Мягьямедовди чан удучIвну улхбаъ гьамци гъапну: «Гизаф йисариинди баркаллувалиинди ва албагну яшамиш шули, ихь дагълу халкьарин аьдатар, тарих уьрхюри, сар-сарин хатур ккидрибтри, намуслувалиинди яшамиш шулайи хизанар – ухьуз айи девлет ву. Узуз учву му йигъа-хъди тебрик апIуз ккундузуз ва учвуз Дюн`яйиъ айи вари уж`валар ккун апIурза».
Серенжемдин аьхириъ гизаф йисариинди албагну, сар-сариз вафалуди, юкIвариъ ккунишин уьбхюри яшамиш шулайи хизанариз «Мюгьюббатназна вафалувализ» кIуру медалар ва кьиматлу пешкешар тувну. Гьацира му йигъан дурариз пешкеш вуди Дербент шагьрин музыкайин училищейиан вуйи студентари ва шагьриъ яшамиш шулайи мяълийирин устадари хизандикан, мюгьюббатнакан ва вафалуваликан вуйи мяълийир гъапIну.
Му машквар ихь дагълуйириз дицикьан таниш вуйиб даршра, саб йишв’ина ужудар хизанар уч дапIну, дурар айивалиин ухьу рази вуйиб улупували, дурариз кIваантIан чухсагъул мялум апIували ихь юкIварра шад гъапIну. Мидланра гъайри, му мяракайиъ иштирак гъахьидариз мицдар хизанар нумунара шул кIури, хиял вуйиз.
