Аьхиримжи йисари ихь дагълу юрднаъ асас фикир тувуз хъюгънайи «Экономика лизи алапIувал» кIуру проектдихъди ляхин кIули гъабхувал давам шула. Экономика артмиш хьпаъ важиблу роль уйнамиш апIурайи дилаварчивалин артмиш`вализ лазум вуйи шартIарикан гизаф кIура. Бикарвал айи ихь республикайин агьалйириз дилаварчивалиъ цIибди вушра ляхин бихъура.

 

Дербент райондиъ дилаварчивал фици артмиш шулаш ахтармиш апIуз ккунди, узу райондин администрацияйин управлениейин кIулин пишекар Ханкерим Багъдаевдихъди гюрюшмиш гъахьунза.

Ханкерим Ширинбеговичди къайд гъапIганси, улхьан йисари райондин администрацияйин, налогарин инспекцияйин, къанунар уьрхру органарин пишекрарикан тешкил гъапIу комиссияйин кюмекниинди гъубшу 2018 – пи йисандин арайиъ 1475 хусуси дилаварчйир налогарин гъуллугънан гьисабнаъ учIвну. Гьацира 358 хусуси дилаварчйирихъ лихурайи 1300 касдихъди зегьметнан йикьрар йитIуз гъитну.

КIулин пишекрин гафариинди, дурарин управленийин вакилари дилаварчйириз лазим вуйи мялуматар администрацияйин сайтдиъ ирчра ва агьалйир гъавриъ тIаъбан ляхин гъабхура. Йикьрар адарди зегьмет зигурайи инсанариз ктIерццу вахтна больничный отпуск туврадар ва мицир пишекар чпиз ккуни вахтна ляхнианра адауз шулу.

«Агьалйирин ихтиярар уьрхюз чалишмиш шули, учу инсанарихьна къанун саягъниинди илтIикIну ккуниваликан кIурача ва дилаварчйирикан гьадму тIалаб апIурача. Райондин агьалйиризра чпин ихтиярарикан аьгъю хьпан бадали, жюрбежюр къайдйириинди мялумат туврача. Гьацира, эгер дилаварчивал артмиш апIан бадали гьюкуматдин терефнаан грантар тувраш, мялуматдихъди инсанар таниш апIуруча. Учу саб вазлин арайиъ 3 ражну налогарин гьисабнаъ учIвдарин, удучIвдарин гьякьнаан мялумат республикайин администрацияйиз хътапIурача. Ав, кризисдин гьялнаъ айи ихь гьюкуматдиъ гьамусяаьт инсанариз читинвалар алахьура. Хусуси дилаварчивал ккебгъдарихьан варидарихьан ляхин кIулиз адабгъуз шуладар. Налогарин кьадар цIиб гъапIнийиш, дурариз кюмек шуйи», – кIура йиз сюгьбатчийи.