Июлин 17-пи йигъан РД-йин милли политикайин ва диндин ляхнариз лигру Министерствойиъ министр Энрик Муслимовди 2019-пи йисан Дагъустандиан гьяждиз гъягърударин месэлйириз бахш дапIнайи пресс-конфереция гъубхну. Душваъ «Марва-Тур» ООО-йин генеральный директор Булат Къурбанов, республикайин СМИ-йин вакилар иштирак гъахьну.
Энрик Муслимовди журналистарин суалариз жаваб туври къайд гъапIганси, гьяждиз гъягърударихъди ва гьяждин гьязурлугвалар гъахру тешкилатчйирихъди аьлакьа уьбхюрайиб РД-йин милли политикайин ва диндин ляхнарин министерство ву. РД-йин миннацди муфтиятдихъди ва «Марва-Тур» компанияйихъди Саудовская Аравияйин Паччагьлугъдиъ ва рякъюъ алахъру жара уьлкйириъ айи жямяаьтлугъдинна политикайин ва марццишнанна эпидемиологияйин аьгьвалатнакан мялуматар тувбан ляхин гъабхура.
Э. Муслимовди гьяждин асас серенжемар гъягъру вахтнаъ хабарсуз дюшюшар арайиз гъафиш, думу месэлйир гьял апIуз «Горячая линия» тешкил дапIнайиваликан ва министерствойин гъуллугъчйири дежурство гъабхруваликан хабар тувнийи.
«Марва-Тур» ООО-йин генеральный директор Булат Къурбановди къайд гъапIганси, гьаму йисан Саудовская Аравияйиз жилин транспортдиъди гъягъруган рякъюъ алахьру уьлкйирин аьтрафариин аьгьвалат саламатуб дарувализ лигну, гьяждиз гъягърударин хатIасузваликан фикир апIури, дурариз жилин зиълан гъябгъру транспортдиъди гъягъюз ихтияр тувнадар. Дагъустандиан гьяждиз гъягърудар рякъюъ тIаъбан бадали «ЮТэйр» авиакомпанияйихъди ва Аьрабарин сатIи вуйи Эмиратарин «Флай Дубай» авиакомпанияйихъди йикьрар йитIна.
Пресс-конференцияйиъ къайд гъапI-ганси, цци гьяждиз гъюгъюз 10 агъзур дагъустанлуйири документар гьязур дапIна.
