Табасаран райондин ЦРБ-йиъ духтир-наркологди лихури Рамис Къурбановдин гьеле 5 йистIан дар.
Райондиъ дугъу саки гьар вазли наркоманияйин, алкоголизмдин зарарнакан лекцйир, сюгьбатар гъахури, пишекарвалин тажрубайиан жюрбежюр мисалар хури, инсандиз тембеку, ички, наркотик кайи сурсатари хру зарарнакан ктибтури шулу.
«Табасаран райондиъ гъябгъюрайи йисан эвелариан мина узухьна 2300-тIан артухъ инсанар илтIикIну. Дурарикан 85 кас алкоголизмдиан кюмек ккун апIурайидар вуйи. Пиянискавалиан гъагъи гьялнаъ ади 48 кас аьзарлуйирси больницайин гьисабназ гъадагъунча. Дурарикан 4 пияниска сагъ апIуз даршлу дережайихъна дуфна. Республикайин наркодиспансерин улупбариинди, Табасаран райондиъ 13 кас наркоманар а. Дурарикан 4 кас дустгъариъ деънайидар ву. Швнур-сар Урусатдин шагьрариъ яшамиш шула. Амма дурар, райондиъ прописка айивализ дилигну, гьисабнаан адауз шуладар. Райондин аьтрафариин яшамиш шулайи наркоманариз, алкоголикариз учу теклиф апIури, дурарихъди кми-кмиди сюгьбатар гъахурача, дурарин сагъвал ахтармиш апIурача. Пуз ккундузузки, учхьан инсандин ихтияр дарди думу гьисабназ гъадагъуз шулдар. Дурар Республикайин наркологический диспансери, чпихьна илтIикIу касдин разивалиинди гьисабназ гъадагъура. Ич вазифа дурарихъди йишвариин ляхин гъабхуб ву. Пуз ккундузузки, йиз ляхнин тажрубайиъ райондиъ наркоманарихъди аьлакьалу гъагъи аьгьвалат арайиз гъафундар. Асас вуди узухьна, духтрихьнаси, пиянискйирикан аьсси духьнайи дурарин хпар, дадйир му уьзур сагъ апIру дарман аш, кюмек ккун апIури илтIикIуру.
Учу наркотикарихъди, алкоголизмдихъди женг гъабхури, райондин жигьиларин тешкилатдин центрин кIулиъ айи Рамис Рамазановдихъди, участокарин инспекторарихъди сатIиди, райондин мектебариз гъягъюри, ихь бицIидарихъди сюгьбатар гъахурача. БицIидарилан гъайри, гюрюшариъ мялимар, гъуларин жигьилар иштирак шулу.
Гъи жигьиларихъди кми-кмиди профилактикайин серенжемар гъахури ккунду. Наркотикдиз рякъ хъябкьюб лазим ву. Ич метлеб гьадму вуйич»,
— къайд гъапIну Рамис Къурбановди.
Наркологдин гафариинди, наркотикарин ва ичкийин асиллувалиъ ахърайидар асас вуди пучIу хасиятнан, чпин гафниин гъузуз даршлу касар ву. Наркотик ишлетмиш апIурайи хайлин жигьилар, сабпи ражари дидин дад фициб вуш ва жандин гьавйир фици шулуш, ахтармиш апIуз ккунди, дидик кучIвра. Наркотикди чпи, аькьрабиси, бацаригъ чIюркьюрайивалин дурар кьандитIан гъавриъ шуладар.
«Сабпи доза пулсузди туври шулу. Гьаддиз ухьу бицIидар, гьеле мектебдиз гъягъюз хъюгъяйиз, пулсузуб анжагъ кьюлар дисру рукьариъ айи нистIан дарубдин гъавриъ тIаъну ккунду. Хулаъ гьарйир, гъалмагълар, курччвру гафар гъапIну кIури, дурарикан кюмек шулдар. Веледдиз абйир-бабарин улихь юкIв ачухъ апIуз манигъвал туврайи далилар фундар вуш, гьадрар аьгъю дапIну ккунду. Жигьилари сабпи ражари наркотик асас вуди хулаъ гъагъи аьгьвалат арайиз дуфнайиган, ишлетмиш апIуру. Узуз, духтриси пуз ккундузуз, эгер инсанди учв сагъ хьуз кIваантIан кьаст дарапIиш, думу сагъ апIуз шлу дарман адар. Вари инсандин фикрилан, психикайилан асиллу шула. Гьаддиз ужуб ва харжиб жара апIуз бицIидихъанмина аьгъяди ккунду»,
– аьлава гъапIну Рамис Жамалудиновичди.
Учура наркологдин фикрин тереф уьбхюрача.
