Гьамусяаьт жюрбежюр сайтариан, махлукьатлу хабрарин дакьатариан Табасаран райондин центриъ зирзибилин урслар духьнайиваликан кми-кмиди рябкъюра ва ебхьура.
Экологияйин ва зирзибил райондиан гъабхбан гьякьнаан улихьнаси РД-йин экологияйин министр Набиюллагь Къарачаевди Табасаран райондиз дуфну, райондин глава Мягьямед Къурбановра ади, жямяаьтлугъдихъди аьхю совещание гъубхну. Хъа совещание гъабхбан кьяляхъра, тендериъ гъалиб гъахьи «Экологи-ка» региондин оператори чаин али вазифйир лазим вуйи къайдайиинди тамам апIурадар.
Му месэлайин гьякьнаан райондин центриъ айи аьгьвалатнакан гьерхри, узу Хючна гъулан глава Аьбдуселим Гираевдихъди сюгьбат гъубхунза.
Дугъан гафариинди, месэла лазим вуйи саягъниинди гьял апIбаъ гизаф читинвалар алахьура».
«ВаритIан асас вуди алабхъурайи читинвал, инсанари вахтниинди чпин зирзибилихъан пул тутруврайивалиан, думу гъабхурайи машинарихъ хъайидариз, жиларилан дабхънайи зирзибил уч апIурайидариз вахтниинди маважиб туврадар. Хьуб вазлин арайиъ пул дяргъюрайивализ дилигну, дурар забастовкайиз удучIвура. Гьаци вушра, дурариз миннат апIури, уч дубхьнайиб гъабхуз гъибтрача. Машинарихъ хъубзрайи ГСМ-ра буржназ хъубзрайиб ву. Му вари ляхнар «Экологи-ка» райондин операторин жавабдарваликкди гъахурайидар ву. Мушваъ администрацияйин тахсир адар. Аьхиримжи ражари гизаф зирзибил уч хьувал гьадму вуки, думу марцц апIрударихъдира ГСМ туврайидарихъдира йикьрар дапIну ашра, райондик кибтIнайи гьадму зирзибил гъабхру машин чIур гъабхьну», – гъапну Хючна гъулан главайи.
Хъа эгер жвуву апIурайи ляхниз маважиб туврадарш, буржлу вуйинхъа думу ляхин апIуз?!
«Мисалназ гъадабгъиш, гъулариан вуйи зирзибил, райондин саб йишвахьна уч апIуз шулу, хъа райондиан думу адабгъуз, лицензия адрувализ лигну, ихтияр адар. Думу вари ляхнар, зиихъ къайд дапIнайиганси, тендериъ гъалиб духьнайи «Экологи-ка» региондин операторин вазифйир ву», – аьлава гъапIну Аьбдуселим Гираевди.
Ав, вахтар дигиш гъахьну. Гьамус гъулариъ саки шагьрариъсдар шартIар тешкил апIура, экологияйиз аьхю фикир тувра. Гъуларин марццишин – асас вазифаси улихь дивна. Гьаддиз, гьюрматлу ватанагьлийир, ихь гъулар гьаммишан марцциди гъузбан бадали, жюрбежюр сайтариъ ихь райондиъ зирзибил уч дубхьна, дабхьна кIурайи видеойир идрирчбан бадали, хъархъсар дишлади гъабхбан бадали, дидихъ тувну ккуни налог вахтниинди тувуз гьяракат йихьай.
