Гьяждиз гъягъюз ккуни мусурмнари вахт ккимиди машквран йигъар аьгъю апIуру ва гьязур хьуз хъюгъру.

2019-пи йисан гьяждин вахт ва Къурбан машквар (аьхю машквар) август вазли хьибди. Аьдат вуйиси, гьяждиз душну гъюбан бадали гизаф туриствалин компанйириз 25 йигъ лазим шулу. Гьаддиз ляхниъ айи мусурмнари чпин отпуск, гьадму йигъариин алабхъруси, планламиш дапIну ккунду. ВаритIан ухди гьяждиз гъягърудар июлин 23-пи йигъан самолетариъди гъягъюз хъюгъну. Дурар августдин 17-пи йигъан кьяляхъ дуфну ккунду. Кьанди гъушу дестйир (августдин 5-пи йигъан) 25 йигълан, яна сентябрин сарариз гъиди.

Гьяждин аьдатар 9-пи августдиъ (зул-хиджайин 8-пи йигъ) Мина дерейиз гъягъбалан ккергъру. 2019-пи йисан Арафатдин йигъ 10-пи августдиина гъюра (зул-хиджайин 9-пи йигъ). Къурбан апIру йигъ 11-пи август ву, хъа Урусатдиъ му йигъан Къурбан-байрам къайд апIиди.
Гьяждин аьдатар 14-пи августдиъ ккудукIиди (ташрикдин аьхиримжи йигъан).

Ухьу улупнайи вахт сад йигъанди мина-тина хьуз мумкин вуйивал гьисабназ гъадабгъну ккунду.