Июлин 27-пи йигъан Пенза шагьриъ спортдин ММА-йин кчIихбарин жюрйирин GFC-15 турнир кIули гъубшну. Душваъ Фонтанарин майдандиин уьлкейин варитIан ужударсдар спортсменар иштирак гъахьну.

Му турнириъ 77 кило гъагънан категорияйиъ табасаран халкьдин вакил, машгьур спортсмен Акбар Гьяжиэкперов (рекорд 11-1) Пензайиан вуйи спортсмен Артем Маноглиевдихъди (рекорд 4-0) кчIихуз удучIвну. ИкибаштIан, Акбар му талитариъ гъалиб гъахьну.

КIвин апIуз ккундучуз, Акбар ММА-йин пишекар кчIихбарин спортсмен, боевой самбойиан ва ММА-йиан вари дюн’яйин кубокарин сагьиб ву. Думу жюрбежюр талитариъ машгьур спортсменар вуйи Мягьямед Муртузялиевдиин, Роман Тимофеевдиин, Антон Минкевичдиин ва жарадариин гъалиб гъахьну.

Акбар Гьяжиэкперов нубатнан гъалибвалихъди тебрик апIури, гележегдиъ дугъаз хъана заан хъуркьувалар ккун апIурача.