27-пи йигъан Москва шагьриъ ММА-йин кчIихбарин жюрйирин FFP-11 вари халкьарин ачухъ вуйи турнир кIули гъубшну. Думу талитариъ ихь ватанагьли (Хив райондин Заан Яракк гъул’ан Каспийск шагьриз кюч гъахьи Аьбдуризаеварин хизандин вакил) Эмин Аьбдуризаев Азербайжандин машгьур спортсмен Кенан Гъулиевдихъди кчIихуз удучIвну.
Табасаран спортсменди Гъулиевдиз гъалиб хьуз саб жюрейин мумкинвал тувундар. КчIихуз улупнайи вахт аьхирихъна гъяйиз Эминди гъалибвал гъадабгъну.
Эмин 2015-пи йисан ММА-йин кчIихбарин жюрйирин Дагъустандин, хъасин Урусатдин финалист, республикайин, вари Урусатдин, халкьарин арайиъ вуйи жюрбежюр ачухъ турнирарин призер, 2016-пи йисан Псков шагьриъ кIули гъубшу Урусатдин ММА-йин кчIихбарин чемпионатдин гъалибчи, 2017-пи йисан Сочи шагьриъ кIули гъубшу вари дюн’яйин кубокдин сагьиб ву.
Эмин 14 йисаъ айиган, бокс уйнамиш апIбиин машгъул гъахьнийи. Кьяляхъна ММА-йин жюрйирин кчIихбариан аьгъювалар гъадагъну, думу спортдин мастериз кандидат гъахьну. Гьамусяаьт Эмин Аьбдуризаев ММА-йин пишекар кчIихбариан заан дережайин турнирариъ иштирак шула. Думу сентябрь вазли Урусатдин ва Турцияйин арайиъ гъябгъру ММА-йин кчIихбарин талитнахьна гьязур шула. Душваъра ихь спортсмендиз хъуркьувалар ккун апIурхьа.
