Гьаму улихьнаси Ставрополь шагьрин «Город 26» типографияйиъ ихь шаир, «Табасарандин нурар» газатдин мухбир Шюшеханум Керимовайин шубубпи, бицIидариз вуйи «Бахтлу бицIивахт» ччвур али китаб чапдиан удубчIвну.

Китабдиъ шаири чан уьмриъ гъахьи гьядисйир шиърариз илтIикIна. Къанна хьуд йисандин арайиъ ккергъбан классариъ баяр-шубариз дарсар киври гъахьи шаирин бицIидарихьна вуйи ккунивалин мани рафтар му китабдиъ ашкар шула. Шюшеханум Керимовайи чан шиърариъ баяр-шубариз табиаьтдин утканвалихьна улар тIауз кюмек апIури, чIиви табиаьт ккун апIуз, инсанвалин, дуствалин гъадри хьуз улупура.

«Узу урус шаирарин бицIидариз вуйи шиърар урхруган, ухьуз дицдар шиърар цIибдитIан адруб гьарган кIваинди шуйзуз. Гьаддиз гьар вахтна бицIидариз вуйи китаб бикIбакан фикрар апIури гъахьунза. БицIидариз вуйи китабдик шикларра духьну ккунивалин гъавриъ ади, Дагъ. Огнийиъ яшамиш шулайи художник Мягьямед Мурадовдихьна илтIикIунза»,

– кIура автори.

Шюшеханум Керимовайи му китаб адабгъуз кюмек гъапIу республикайин Халкьдин Собраниейин депутат Марат Аслановдиз чухсагъул кIура.