Аьхиримжи вахтна табасаран писателари ва шаирари багъри литература артмиш апIури, цIийи эсерар арайиз хурайивалиин, жигьилар, бицIидар маракьлу шлударстар китабар чапдиан адагъурайивалиин рази дархьиди гъузуз шулдар.

Магьа цIиб улихьнаси ихь машгьур шаир Керим Маллаевдин урус чIалниинди вуйи «Ляхла ва ляхлаар, тарих ва гъийин девир» ва «КIажар гукIуни а» китабар чапдиан удучIвну.

Сабпи китабдиъ автори багъри Ляхла гъул фила ва фици арайиз гъафнуш, гъулаъ яшамиш шули гъахьи ва гьамусяаьт айи тухмарин тарихдикан, гъулан агьалйирикан, Ватандин Аьхю дявдиъ бейхабарди гъудургдарикан ва кьяляхъ гъафидарикан, жара юрдариз гъушдарикан, халачачйирикан, гъулан аьдатарикан, кюгьне ерли машкврарикан ва гь.ж. лап дерин мяна ади ачухъ апIура.

Автори гьацира «сельсовет Ляхлинский» гъулан поселениейиз дахил шулайи Кьуликк, Ккувигъ, УртIил, Гьяригъ гъуларин тарихдиканра гъунши гъуларин ватандашариканра мялуматар тувна.

«КIажар гукIуни а» китаб урус чIалниинди дидикIнайи ва табасаран чIалнаан таржума гъапIу эсерарин гъварч ву. Китабдин эвелин гафнаъ РФ-дин писателарин Союздин член, писатель, дрматург Кюребег Мурсаловди бикIурайиганси, Керим Маллаевдин китабдиъ чап дапIнайи шиърари, эсерари хайлин ватандашар, багъри ватандин успагьивалихъди, инсандин марцци гьиссарихъди, дуствалин мюгькам кьувватлувалихъди таниш апIиди.