XX аьсрин 20-30-пи йисарихъан мина баяр-шубар, жигьилар, яшлу касар физкультурайиин машгъул хьуз гъитбаз ихь гьюкуматди гизаф фикир туври гъахьну. Сагъу уьмрин терефкрар имбударизра нумуна вуди гъахьи йисари гьарсар касдиз чан сагъламвалин гъайгъу зигуз аьгъяйи.
Анжагъ 1980-пи йисхъан мина август вазлин кьюбпи шембе йигъан физкультурникдин Йигъ къайд апIуз хъюгъну, ва ццийин йисан тренерарин, спортсменарин, физкультура кивру мялимарин ва спортдиин юкIв алидарин му машквар гъябгъюрайи вазлин 10-пи йигъан къайд гъапIну. Ихь республикайин шагьрариъ, гъулариъ думу йигъахъди аьлакьалу жюрбежюр талитар кIули гъушну.
Дугъриданра, физкультурайихьна, спортдихьна маракьлувалиинди илтIикIну, чпин азад вахт стадиондиъ, спортзалиъ ва спортдин майднариъ гьаърайи инсанар ухьуз нумуна ву. Му макьала бикIуз гьязур шули, узу Дагъустандин Огни шагьрин 2-пи нумрайин спортдин мектебдин тренер, ихь ватанагьли Вадим Мягьямедовдихъди гюрюшмиш гъахьунза.
БицIи вахтнахъан мина спортдиин юкIв али Вадим Фейзуллаевич Табасаран райондин Думурхьил гъулаъ бабкан гъахьну. Дурарин хизан ухдихъан мина Дагъустандин Огни шагьриъ яшамиш шула. Мектеб ккудубкIбан кьяляхъ Дагъустандин пединститут ккудубкIну, бицIи вахтнахъан мина волейболиин машгъул вуйи жигьили, Урусатдин жюрбежюр шагьрариъ кIули гъушу талитариъ иштирак шули, сабпи йишвар гъадагъури гъахьну.
«Узу 2010-пи йисан Дагъустандин Огни шагьрин спортдин мектебдиъ тренерди лихуз хъюгъюнза. 1996-пи йисхъан мина ич шагьриъ спортсменарикан ибарат вуйи «Табасарандин нурар» кIуру команда а. Узура думу командайихъди волейболиан, футболиан жюрбежюр талитариъ иштирак шулаза. Гьацира, мини-футболиан ЮФО-йиъ гъягъру талитариъра иштирак хьпан бадали, «Табасарандин нурар» кIуру команда тешкил гъапIунча. Узу Табасаран, Хасавюрт районариан вуйи волейболин командйирихъди талитариъ иштирак шули, 6 ражари Дагъустандин чемпионра гъахьунза. Гьацира му районарин командйирин дахилнаъди хьадан вахтнан гъулан спортдин Вариурусатдин IX талитарин чемпионра вуза. Думу талитар Курск, Чебоксары шагьрариъ тешкил гъапIнийи», – ктибтура Вадим Фейзуллаевичди.
Чан кеспнахъ юкIв хъайи Вадим Мягьямедовди, артмиш шулайи насларин спортдихьна вуйи маракьлувал артухъ хьпан бадали, гизаф зегьмет зигура. Думу баяр-шубариз, жигьилариз чпин уьмрихьна вижнасузди илтIитIикIди яшамиш духьну ккунивалин нумуна ву.
«Август вазлин 15-пи йигъан ич шагьриъ пляждин волейболиан талитар тешкил апIурача. Узу Табасаран райондиан вуйи «Табасаран», «Хьарагъ», «ТинитI» командйириз теклиф апIуз гъушнийза. Думу командйир талитариъ иштирак хьиди», – давам гъапIну йиз сюгьбатчийи.
Вадим Фейзуллаевич ва думуси ихь баяр-шубарин, жигьиларин сагъ’валин гъайгъушнаъ айи тренерар, физкультурайин мялимар, спортсменар, спортдиин юкIв алидар му гъубшу машкврихъди тебрик апIури, дурариз артухъдиси хъуркьувалар ккун апIурхьа. Гьацира «Табасарандин нурар» газатдинна «Табасарандин нурар» спортдин командайин вакиларин арайиъ дуствалин аьлакьйир шлувалиин умудлу хьидихьа.
