Августдин 9-диан 13-пи йигъаз Табасаран райондиъ физкультурникдин Йигъаз бахш дапIнайи футболиан, волейболиан ва столиин уйнамиш апIру теннисдиан спортдин талитар кIули гъушну. Дурар райондин 90 йисандин юбилей къайд апIбан серенжемарин дахилнаъди тешкил дапIнайидар вуйи.
Волейбол
Волейболиан сарихьан сарихьна гъябгъру кубок ва «Табасаран район» МР-ин главайин пешкеш бадали кIули гъушу талитариъ райондин гъуларин 7 команда иштирак гъахьну. Натижайиъ «Халагъ гъулан совет» СП-йин «Бухьнагъ» команда 1-пи йишван сагьиб гъабхьну, «Хюрикк гъулан совет» СП-йин «Ругуж» командайи – 2-пи йишв, хъа «Къужник гъулан совет» СП-йин «Хьарагъ» командайи – 3-пи йишв гъадагъну.
Сабпи йишваз лайикьлу гъабхьи «Бухьнагъ» команда райондин сарихьан сарихьна гъябгъру кубокдихъди, гьюрматнан грамотайихъди ва пешкешнахъди, имбу командйир – тялукь пешкешарихъди ва гьюрматнан грамотйирихъди лишанлу гъапIну.
Столиин уйнамиш апIру теннис
Столиин уйнамиш апIру теннисдиан талитназ 15 кас удучIвнийи. Заан устадвал улупу Аьли Гьясанбегов (Ягъдигъ гъул) 1-пи йишваз лайикь гъахьну. Руслан Аьлисултановди (Хюрикк гъул) 2-пи, хъа Мустафа Ханягьмадовди (Хючна гъул) 3-пи йишвар гъазанмиш гъапIну.
Спортсменар администрацияйин руководствойин терефнаан гьюрматнан грамотйирихъди, пешкешарихъди лишанлу гъапIну.
Футбол
Августдин 9-диан 13-диз Хючна гъулан стадиондиин футболиан «Табасаран район» МР-ин главайин пешкешназ кIули гъушу талитариъ райондин гъуларин 11 команда иштирак гъахьну. Думу командйирин арайиъ хьуд йигъан кIули гъубшу женгнаъ финалин тамшийиз «Гурихъ» ва «ГьепIил» командйир удучIвнийи. Улихьна йисарира саб-швнуд ражари футболиан сабпи йишв гъадабгъури гъабхьи «Гурихъ» командайи чан пишекарвалин заан дережа тасдикь гъапIнийи. Натижайиъ футболин командйирин арайиъ йишвар гьамци пай гъахьну: «Гурихъ гъулан совет» СП-йин «Гурихъ» команда – 1-пи йишв, «ГьепIил гъулан совет» СП-йин «ГьепIил» команда – 2-пи йишв, «Гурихъ гъулан совет» СП-йин «Гюгьрягъ» команда – 3-пи йишв.
Талитариъ гъалиб гъахьидариз дипломарна пулин дакьатар тувну.
Дюн’яйин жигьиларин Йигъаз тялукь вуди
13-пи августдиъ Табасаран райондин Хючна гъулан стадиондиъ жигьиларин центри, дюн’яйин жигьиларин Йигъаз бахш вуди жюрбежюр йи-гъинжагъар кIули гъухну.
Серенжем Табасаран райондин искусствойин мектебдиъ айи бицIидарин оркестри халкьдин мукьмар йивури абццнийи. Хъасин «Поезд» кIуру эстафета, «Шид убхърудар» ва «Супермен» кIуру зарафатнан конкурсар кIули гъухнийи.
«Хизандин ижми аьлакьйир» кIуру конкурсдиъ 7 хизан иштирак гъахьну. 1-пи йишв ГьепIларин гъул’ан вуйи Аьбдурягьмановарин хизанди гъибисну.
Хючна гъул’ан вуйи Сяидоварин хизан 2-пи йишваз, 3-пи йишваз Хючна гъул’ан вуйи Шагьбановарин хизан лайикьлу гъахьну.
Му серенжемдиъ гъалиб гъахьидариз жигьиларин центрин кIули айи Рамис Рамазановди, ЦБС-дин директор Рафик Аьлиевди, ТОКСдин штабдин начальник Аьбдусалам Аслановди кубокар, дипломар ва медалар тувну.
Йигъинжагъ тешкил апIуз жигьиларин центриз культурайин гъуллугъчйирира хайлин кюмек гъапIну.
