Гъубшу йисан Москва шагьриъ вари Урусатдин «Йисандин варитIан ужур директор» конкурсдиъ образованиейин цирклиан вуйи номинацияйиъ ихь ватанагьли Эльвира Мирзаева гъалиб гъахьну. Эльвира чан хизандихъди Ставрополь шагьриъ яшамиш шула. Дугъан абйир-бабар Ставрополь крайдиз Табасаран райондин Жвули гъул’ан кючмиш гъахьидар ву.
Эльвира Мирзаева Ставрополиъ яшамиш шулашра, кми-кмиди багъри ватандиз гъюра. Думу вари дюн’яйин 50-рихьна жюрбежюр уьлкйириз сиягьятназ гъушну. Амма багъри ватандиз вуйи рякъ дугъаз варитIан кьабулди ву. Нубатнан ражари Дагъустандиз гъафир думу багъри «Табасарандин нурар» газатдин редакцияйизра хялиш гъахьнийи. Дугъу учуз чан уьмрикан, Ставрополиъ арццрайи чан хусуси мектебарикан ва бицIидарин багъарикан, учв иштирак шулайи жюрбежюр конкурсарикан ктибтну.
Эльвирайи чан сабпи хусуси мектеб, абйир-бабарин кюмекниинди, 9 йис мидиз улихьна абццнийи. Мектебдиъ инглис, немец, француз, китай, япон ва жара харижи уьлкйирин чIалариан аьгъювалар тувра. Харижи чIалар дургъуз баяр-шубар аьхю аьшкьниинди гъюрайивал гъябкъиган, дугъу мектеб яркьу апIуз къарар адабгъну. Мектебдиъ Великобритания, Канада, США гьюкуматариан мялимар лихура. Мектеб гьяракатнаъ ипхъан мина душваъ 5 агъзурихьна баяр-шубари аьгъювалар гъадагъну. Эльвирайин мектеб дюн’яйиъ машгьур вуйи франшиза саягъниинди либхурайи тешкилатдин language link карханайин дахилнаъди абццну. Думу тешкилатдин асас офис Лондондиъ ерлешмиш дубхьна. КIулин тешкилатди мектебарин мялимарин пишекарвалин дережа, дарс кивбан методика ахтармиш апIура, чпин дахилнаъ айи мектебариз мялимар агура.
«Дюн’яйин артмиш вуйи харижи уьлкйирин мялимариз Ставрополиз ляхниз гъюз ккунди шулдар. Хъа гьадму тешкилатди мялимар агура, дурарихъди йикьрар йитIура ва ляхнариз гьаъра. Мисалназ, учуз мялимар агуз дурари хайлин кюмек гъапIну. БицIидарин багъдиъра 70-рихьна баяр-шубари тербия гъадабгъура. Багъдиъра бицIидари инглис чIал дубгъура. Гьаму урхбан цIийи йисан учу мектебдин ккергъбан классарин ва сабсана бицIидарин багъ ачмиш апIурача», – гъапну Эльвирайи.
Чав иштирак гъахьи конкурсдикан ктибтури, Эльвира Фармановнайи къайд гъапIганси, дугъаз конкурсдиъ иштирак хьпан теклиф Ставрополь крайдин образованиейин улихь-кIулихь хьайидари гъапIнийи. Конкурсдиъ вари цирклариан дишагьлийир иштирак шулайи. Аьхиримжи йисари Ставрополь крайдиъ образованиейин цирклиъ Эльвира Мирзаевайи гъабхурайи баркаллу ляхниз, Ставрополь шагьрин администрацияйин ва жямяаьтлугъ тешкилатарин терефнаан вуйи чухсагъул мялум апIбан кагъзар, гьюрматнан грамотйир ва кIули гъуху рягьимлувалин акцйир гьисабназ гъадагъну, жюрийин вари вакилари дугъаз заан кьиматар дивнийи. Гьаци думу «Йисандин варитIан ужур директор» ччвурназ лайикьлу гъахьну.
«Узуз йиз ляхин гизаф кьабулди вузуз. Хъа жвуван ляхни жвувазси, жара инсанаризра хайир хурайивал рябкъруган, лихуз артухъ аьшкь гъюру. Гьаци лихуз узу йиз адашдихъан гъудубгъунза. Гьарсаб ляхниъ думу нумуна вузуз. Абйир-бабарин теклифарихъ, насигьятарихъ хъпехъури гъабхьиш ва фунуб вушра ляхин юкIв хъади тамам апIуруш, натижйирра заандар шулу», – къайд гъапIну ич сюгьбатнан аьхириъ Эльвира Фармановнайи.
Эльвирайиз чан кIван умударихъ хъуркьувал ккун апIурача. Хъа мици марцци кIваан апIру ляхнин натижа анжагъ саб шулу – хъуркьувалар! Гъит, ихь риш гьарган хъуркьувалар айир ишри!
